ឯកអគ្គរាជទូតកម្ពុជាប្រចាំកូរ៉េខាងត្បូង ថា គ្មានជនជាតិខ្មែរឆ្លង COVID-19 ឡើយ
- February 27, 2020
មុននេះបន្តិចទូរទស្សន៍ជាតិកម្ពុជា បានធ្វើការ Live សម្ភាសន៍ផ្ទាល់ជាមួយឯកឧត្ដម ឡុង ឌីម៉ង់ ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង ដោយបានអះអាងថា ប្រទេសកូរ៉េខាងត្បូងមានជនបរទេសតែ ២ នាក់គត់ឆ្លងជំងឺ COVID-19 នេះ។ ដោយក្នុងនោះគ្មានឡើយជនជាតិខ្មែរ ហើយជនបរទេសដែលកើត COVID-19 នេះគឺមានទាហានជនជាតិអាមេរិកម្នាក់ និងស្ត្រីជនជាតិម៉ុងហ្គោលីម្នាក់វ័យជាង ៦០ ឆ្នាំដែលទៅព្យាបាលជំងឺក្រិនថ្លើមនៅទីនោះ ហើយក្រៅពីនោះសុទ្ធសឹងតែជាជនជាតិកូរ៉េ។
ឯកឧត្ដមបានបន្តទៀតថា ដើម្បីទប់ស្កាត់ជំងឺ COVID-19 ខាងស្ថានទូតកម្ពុជាប្រចាំកូរ៉េខាងត្បូងបានចេញវិធានការមួយចំនួន ដើម្បីឲ្យសាច់ញាតិបងប្អូនជនជាតិខ្មែរនៅកូរ៉េមានភាពកក់ក្ដៅដូចជា៖
+ ចេញសេចក្ដីជូនដំណឹងដល់ពលរដ្ឋខ្មែរគ្រប់រូប ឲ្យដឹងពី COVID-19
+ បញ្ហាពីលេខទូរស័ព្ទទាក់ទង ១៣៣៩ សម្រាប់ករណី COVID-19
+ ប្រជាពលរដ្ឋខ្មែរដែលមានការសង្ស័យណាមួយ សូមទាក់ទងទៅកាន់បណ្ដាញសង្គមហ្វេសប៊ុក និងលេខទូរស័ព្ទ
+ បង្កើតបណ្ដាញសង្គមគ្រុប messenger, kakaotalk ដែលមានសមាគមជាង ៣០ នៅកូរ៉េដើម្បីទំនាក់ទំនងគ្នា
+ ទំនាក់ទំនងទៅកាន់សហគមន៍ខ្មែរនៅតំបន់ Daegu ដែលកំពុងផ្ទុះ COVID-19 ដើម្បីដឹងពីស្ថានភាព
+ ភ្ជាប់ទំនាក់ទំនងជាមួយលោកគ្រូអ្នកគ្រូនៅមជ្ឈមណ្ឌលគាំពារពលករបរទេសដែលមានជនជាតិខ្មែរធ្វើការ ដើម្បីឆ្លើយឆ្លងដឹងពីសុខទុក្ខគ្នា
+ ពន្យល់ និងណែនាំកុំឲ្យប្រជាជនមានភាពភ័យខ្លាចខ្លាំងពេក ហើយងាកមកទប់ស្កាត់វិញ
+ ទាក់ទងនិស្សិតខ្មែរនៅ Daegu ដើម្បីដឹងពីសុខទុក្ខ
+ ណែនាំពលរដ្ឋខ្មែរឲ្យស្វែងរកប្រភពព័ត៌មានសិន មុនជឿលើអ្វីមួយ
ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង បានបញ្ចេញរបាយការណ៍ទាក់ទិននឹងចំនួនជនជាតិខ្មែរដែលមករស់នៅជាង ៦ម៉ឺននាក់ ក្នុងនោះមានពលករជាង ៤៦០០០ នាក់ អ្នករៀបការជាមួយជនជាតិកូរ៉េជាង ៨០០០ នាក់ និងនិស្សិតជាង ៤០០ នាក់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ helloគ្រូពេទ្យ
- Share This Post: