Apple នឹងត្រូវសងប្រាក់ ៥០០លានដុល្លារ ដោយសារធ្វើឲ្យ iPhone ស៊េរីចាស់ៗដើរយឺតខុសធម្មតា
- BY
- autoadmin
- March 4, 2020
អាមេរិក៖ ក្រុមហ៊ុនផលិតទូរស័ព្ទខ្នាតយក្សរបស់អាមេរិក គឺក្រុមហ៊ុន Apple គ្រោងនឹងចាយលុយប្រមាណជាកន្លះពាន់លានដុល្លារ ដើម្បីដោះស្រាយពាក្យបណ្ដឹងពីសំណាក់ក្រុមអតិថិជនមួយចំនួន ដែលមានបញ្ហាទូរស័ព្ទ iPhone ដើរយឺតខុសប្រក្រតី។ បើយោងតាមការចុះផ្សាយនៅក្នុងសារព័ត៌មាន CNN បានឲ្យដឹងថា មានអតិថិជនអាមេរិក ដែលរស់នៅក្នុងរដ្ឋ California សហរដ្ឋអាមេរិកជាច្រើននាក់ មានបញ្ហារួមគ្នាមួយគឺទូរស័ព្ទ iPhone របស់ពួកគេស្រាប់តែដើរយឺតខុសប្រក្រតី ហើយពួកគេក៏បានដាក់ពាក្យបណ្ដឹងទៅកាន់តុលាការ ដើម្បីទាមទាសំណងពីក្រុមហ៊ុន iPhone មកវិញ។
ឆ្លើយតបនឹងរឿងក្តីមួយនេះ ខាងក្រុមហ៊ុន Apple បានសារភាពថា កាលពីអំឡុងខែ ធ្នូ ឆ្នាំ ២០១៧ កន្លងទៅនេះ ខាងក្រុមហ៊ុនពិតជាមានបញ្ហា Software មែន ដែលធ្វើឲ្យទូរស័ព្ទមួយចំនួនត្រូវដើរយឺតខុសប្រក្រតី ក្រោយធ្វើការ Update Software។ ក្រុមហ៊ុនបានបន្តថា ទូរស័ព្ទដែលមានបញ្ហាទាំងនោះអាចជាទូរស័ព្ទម៉ូដែល iPhone 6, 6 Plus, 6S, 6S Plus, 7, 7 Plus និង SE Device។ ក្រុមហ៊ុន Apple បន្តថា ការទូទាត់ប្រាក់សំណងនេះអាចធ្វើឡើងតាមរយៈរូបភាព អនុញ្ញាតឲ្យអតិជិជនយកទូរស័ព្ទចាស់មកប្តូរយកទូរស័ព្ទស៊េរីថ្មី តែមិនមែនជាការផ្តល់ជូនលុយសុទ្ធទៅកាន់អតិថិជនឡើយ។ យ៉ាងណាក្តី តាមការប៉ាន់ស្មាន ក្រុមហ៊ុន Apple នឹងត្រូវខាតបង់លុយចន្លោះពី ៣១០ លាន ទៅ ៥០០ លានដុល្លារអាម៉េរិក ក្នុងការដោះស្រាយក្តីមួយនេះ៕
អត្ថបទ៖ ភក្តី
- Share This Post: