មហាសេដ្ឋីថៃ បោះទុនសង់រោងចក្រផលិតម៉ាស ចូលរួមប្រឆាំង COVID-19
មហាសេដ្ឋីមានជាងគេក្នុងប្រទេសថៃ នឹងចាប់ផ្តួចផ្តើមសាងសង់រោងចក្រមួយកន្លែង ក្នុងរយៈពេល៥សប្តាហ៍ ដើម្បីផលិតម៉ាសអនាម័យ ប្រមាណ៣លានម៉ាស ជារៀងរាល់ខែ ដើម្បីចូលរួមក្នុងយុទ្ធនាការប្រឆាំងនឹងវ៉ីរុស ផ្លូវដង្ហើមថ្មី COVID-19។
តាមប្រភពព័ត៌មាន Asian Review លោក ដានីន ឈៀរ៉ាវ៉ាណន ជាប្រធានក្រុមហ៊ុន CP (Charoen Pokphand Group) បានឱ្យដឹងថ្មីៗនេះថា ក្រុមហ៊ុនCP នឹងវិនិយោគលុយប្រមាណ ១០០លានបាត (ស្មើ៣,១៩លានដុល្លារអាមេរិក) ទៅលើគម្រោងបង្កើតរោងចក្រផលិតម៉ាសខាងលើ។ ក្នុងនោះក្រុមហ៊ុន នឹងប្រើប្រាស់ធនធាន វិនិយោគលើម៉ាស៊ីនផលិត និងសម្ភារៈវត្ថុធាតុដើម ក្នុងលក្ខណៈស្តង់ដាអនាម័យ ក្នុងទិសដៅសំខាន់តែមួយគត់គឺ ប្រឆាំងនឹងវ៉ីរុស COVID-19។
សម្រាប់គម្រោងផលិតម៉ាសនោះ មហាសេដ្ឋីថៃខាងលើ សន្យាថានឹងចែកម៉ាសអនាម័យដោយឥតគិតថ្លៃ ទៅផ្គត់ផ្គង់ នៅតាមមន្ទីរពេទ្យ ក៏ដូចជាប្រជាពលរដ្ឋ ដែលមានតម្រូវការចាំបាច់។
ក្រៅតែពីការវិនិយោគបង្កើតរោងចក្រខាងលើនេះ ក្រុមហ៊ុនដែលរកចំណូលពីវិស័យកសិកម្ម ចំណីអាហារ ខាងលើ ក៏កំពុងចូលរួមយ៉ាងសកម្មជាមួយ បណ្តាក្រុមហ៊ុនពិភពលោកដទៃទៀត ដូចជា សហការជាមួយក្រុមហ៊ុនជប៉ុន និងតៃវ៉ាន់ វិនិយោគទឹកប្រាក់ជាច្រើន ក្នុងទិសដៅរួមតែមួយ គឺធ្វើយ៉ាងណាប្រឆាំងនឹងមេរោគ COVID-19 ដើម្បីស្ថារស្ថានភាពសេដ្ឋកិច្ច៕
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ