ចិនគ្រោងពង្រីកការតេស្ដវ៉ាក់សាំងប្រឆាំងកូវីដ១៩ ទៅប្រទេសផ្សេង
- April 2, 2020
អ្នកវិទ្យាសាស្ត្រចិនដែលកំពុងធ្វើតេស្ដលើវ៉ាក់សាំងការពារវីរុស COVID-19 នឹងប្រកាសលទ្ធផលលើការតេស្ដសាកល្បងលើកទី១នេះនៅក្នុងខែមេសានេះ និងសង្ឃឹមថាអាចបន្តធ្វើតេស្ដសាកល្បងក្រោយៗទៀតនៅប្រទេសផ្សេងទៀតដែលកំពុងមានករណីឆ្លងវីរុសនេះខ្លាំង។ លោក Chen Ling អ្នកឯកទេសផ្នែកវីរុសនៅមន្ទីរពិសោធន៍ជំងឺផ្លូវដង្ហើម State Key បានលើកឡើងថាការធ្វើតេស្ដសាកល្បងនៅដំណាក់កាលទី២ និងទី៣អាចនឹងត្រូវការអ្នកចូលរួមរាប់ពាន់នាក់ និងអាចធ្វើតេស្ដសាកល្បងនៅប្រទេសដែលកំពុងឆ្លងវីរុសខ្លាំងដើម្បីទទួលបានលទ្ធផលកាន់តែឆាប់ និងត្រឹមត្រូវច្បាស់លាស់។
លោកពន្យល់ថាប្រទេសអាចទប់ស្កាត់ការឆ្លងវីរុសCOVID-19 បានលឿនពេក គឺធ្វើឲ្យមិនមានករណីឆ្លងសម្រាប់ធ្វើតេស្ដសាកល្បងនៅដំណាក់កាលក្រោយ។ ឧទាហរណ៍ប្រសិនជាតេស្ដលើមនុស្ស១០ ០០០នាក់ ហើយលទ្ធផលបង្ហាញថាមានតែមនុស្ស១០០នាក់អាចបង្កើតអង់ទីករប្រឆាំងវីរុសនេះបាន លទ្ធផល០,០១% នេះមិនគ្រប់គ្រាន់ក្នុងការប្រើប្រាស់វ៉ាក់សាំងនេះទៅលើមនុស្សទូទៅទេ។
អ្នកស្រី Chen Wei អ្នកជំនាញជំងឺឆ្លង និងវីរុសនៅសាកលវិទ្យាល័យវិទ្យាសាស្ត្រវេជ្ជសាស្ត្រយោធាបានប្រាប់ទៅសារព័ត៌មាន China Daily ថាប្រសិនជាលទ្ធផលតេស្ដលើកដំបូងបញ្ជាក់ថាវ៉ាក់សាំងមានសុវត្ថិភាព និងមានលទ្ធផលតាមដែលចង់បាន ប្រទេសចិននឹងបន្តធ្វើតេស្ដរកប្រសិទ្ធភាពវ៉ាក់សាំងនេះនៅប្រទេសផ្សេងបើវីរុសនេះនៅតែបន្តរាតត្បាត។ អ្នកស្រីបានបន្តទៀតថាមានប្រទេសជាច្រើនមានចំណាប់អារម្មណ៍សហការជាមួយក្រុមអ្នកវិទ្យាសាស្ត្ររបស់ប្រទេសចិនក្នុងការធ្វើតេស្ដវ៉ាក់សាំងនេះ។
ការធ្វើតេស្ដសាកល្បងវ៉ាក់សាំងលើកដំបូងធ្វើឡើងនៅទីក្រុងអ៊ូហាននៅថ្ងៃទី១៦ ខែមីនា ដែលមានអ្នកស្ម័គ្រចិត្តចាក់វ៉ាក់សាំងនេះ ១០៨នាក់។
គិតមកដល់ថ្ងៃនេះ ករណីអ្នកឆ្លងវីរុស COVID-19 សរុបមានចំនួន ៩២៥ ១៣២ករណី ក្នុងនោះអ្នកស្លាប់ ៤៦ ២៩១នាក់ និងអ្នកជាសះស្បើយ ១៩៣ ៤៥៥នាក់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: