ចិនបន្ថែមតួលេខអ្នកស្លាប់ដោយកូវីដ១៩នៅទីក្រុងអ៊ូហានជាង១ពាន់នាក់ទៀត
- April 17, 2020
ទីក្រុងអ៊ូហាន ប្រទេសចិនដែលតំបន់ផ្ទុះវីរុស COVID-19 លើកដំបូងបានដំឡើងតួលេខអ្នកស្លាប់នៅថ្ងៃទី១៧ ខែមេសានេះ ជិត៥០%បន្ថែមទៀតលើចំនួនអ្នកស្លាប់ដែលបានកត់ត្រាកន្លងមកដោយថាការរាយការណ៍ករណីស្លាប់ពីមុនមានកំហុសឆ្គងខ្លះៗ។
អាជ្ញាធរទីក្រុងអ៊ូហានបានបង្ហោះសារក្នុងបណ្ដាញសង្គមថាចំនួនអ្នកស្លាប់នៅអ៊ូហានបានបន្ថែម១ ២៩០នាក់ទៀតដែលនេះធ្វើឲ្យចំនួនស្លាប់សរុបក្នុងទីក្រុងនេះមាន ៣ ៨៦៩នាក់។ ការផ្លាស់ប្តូរតួលេខនេះ ក៏បានធ្វើឲ្យចំនួនអ្នកស្លាប់សរុបទូទាំងប្រទេសចិនកើនជិត ៣៩%បន្ថែមទៀត ឬស្មើនឹង ៤ ៦៣២នាក់។
មជ្ឈមណ្ឌលប្រឆាំងជំងឺឆ្លងនៅទីក្រុងអ៊ូហានក៏បានលើកហេតុផលជាច្រើនទាក់ទងនឹងកំហុសឆ្គងនេះថាមកពីបុគ្គលិកពេទ្យពិបាកក្នុងការរាយការណ៍ដោយសារករណីឆ្លងមានការកើនឡើងខ្លាំងដែលនេះបង្កឲ្យមានការរាយការណ៍យឺត បាត់ទិន្នន័យ ឬរាយការណ៍ខុសជាដើម។ មជ្ឈមណ្ឌលប្រឆាំងជំងឺឆ្លងនៅទីក្រុងអ៊ូហានបានបន្តថាមកពីកន្លែងធ្វើតេស្ដ និងព្យាបាលមិនគ្រប់គ្រាន់ ហើយអ្នកជំងឺមួយចំនួនបានស្លាប់នៅផ្ទះ ដូចនេះហើយទើបការស្លាប់នេះមិនបានរាយការណ៍ត្រឹមត្រូវ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: