មកពីបែបនេះ ទើបស្ត្រីឆ្លងកូវីដ-១៩ នៅបន្ទាយមានជ័យ បុរសនៅកំពង់ឆ្នាំង ព្យាបាលយូរហើយ តែមិនទាន់ជា
- May 7, 2020
ក្នុងចំណោមអ្នកឆ្លងជំងឺ COVID-19 ទាំង១២២ករណីនៅកម្ពុជា ក្រុមគ្រូពេទ្យបានព្យាបាលជាសះស្បើយចំនួន ១២០នាក់ហើយ នៅសល់តែ ២នាក់ប៉ុណ្ណោះ។ អ្នកជំងឺ២នាក់នោះ ជាជនជាតិខ្មែរ ដោយម្នាក់ជាស្ត្រី នៅខេត្តបន្ទាយមានជ័យ និងម្នាក់ទៀតជាបុរស នៅខេត្តកំពង់ឆ្នាំង ហើយបានចំណាយពេលព្យាបាលយូរមកហើយដែរ តែទាន់ជាសះស្បើយ។
តាមការឲ្យដឹងពីវេជ្ជបណ្ឌិត កែវ សុភ័ក្រ្តា ប្រធានមន្ទីរពេទ្យបង្អែកខេត្តបន្ទាយមានជ័យ ស្រ្តីឆ្លងជំងឺ COVID-19 រូបនោះ អាយុ ៣៦ឆ្នាំ ហើយបានរកឃើញវិជ្ជមាន COVID-19 តាំងពីថ្ងៃទី២៩ ខែមីនា មកម្ល៉េះ។ ចាប់តាំងពីថ្ងៃព្យាបាលមក ក្រុមគ្រូពេទ្យបានយកសំណាកទៅពិនិត្យច្រើនដងហើយ នៅតែវិជ្ជមាន COVID-19 ដដែល តែស្ថានភាពសុខភាពអ្នកទាំង២ មិនមានវិវត្តអ្វីគួរឲ្យព្រួយបារម្ភនោះទេ។
ចំពោះមូលហេតុដែលស្ត្រីខាងលើព្យាបាលយូរហើយ តែមិនទាន់ជានោះ លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល បានបញ្ជាក់ថា ត្បិតតែមានវ័យកណ្តាល ក៏ប៉ុន្តែស្រ្តីរូបនេះមានបញ្ហាផ្លូវចិត្ត យប់ឡើងគេងមិនលក់ ធ្វើឲ្យការឆ្លើយតបនៃអង្គបក្ខដិបក្ខសម្រាប់ទប់ទល់ជាមួយវីរុស COVID-19 មិនទាន់ខ្លាំងក្លានៅឡើយ។
ងាកទៅខេត្តកំពង់ឆ្នាំងវិញ លោកវេជ្ជបណ្ឌិត ប្រាក់ វ៉ុន ប្រធានមន្ទីរពេទ្យបង្អែកខេត្ត បានប្រាប់ឲ្យដឹងថា បុរសឆ្លងវីរុស COVID-19 រូបនេះ វ័យ ៧៥ឆ្នាំ បានឆ្លងវីរុស COVID-19 បន្ទាប់ពីត្រលប់មកពីចូលរួមពិធីសាសនានៅប្រទេសម៉ាឡេស៊ី កាលពីថ្ងៃទី១៧ មីនា ឆ្នាំ២០២០។ ចំពោះមូលហេតុដែលបុរសខ្មែរខាងលើ ព្យាបាលយូរហើយនៅតែមិនទាន់ជាសះស្បើយនោះ លោកជំទាវ ឱ វណ្ណឌីន ពន្យល់ថា អ្នកជំងឺរូបនេះមានវ័យចំណាស់ ហើយម្យ៉ាងទៀតមានបញ្ហាសុខភាពផ្ទាល់ខ្លួនស្រាប់ពីមុនម៉ោ។
ទោះបីជាអ្នកជំងឺ COVID-19 ទាំង២ ប្រើពេលយូរក្នុងការព្យាបាលក្តី តែលោកជំទាវអ្នកនាំពាក្យក្រសួងសុខាភិបាលអះអាងថា បច្ចុប្បន្នក្រុមគ្រូពេទ្យកំពុងសស្រាក់សម្រាំ និងផ្លាស់ប្តូរបទពិសោធន៍គ្នា ដើម្បីជួយអ្នកជំងឺទាំង២នោះឲ្យកាន់តែប្រសើរឡើង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: