ក្រៅពីមានជំងឺកូវីដ-១៩ អ្នកជំងឺនៅបន្ទាយមានជ័យ និងកំពង់ឆ្នាំង មានជំងឺ៣មុខនេះប្រចាំកាយទៀត
- May 11, 2020
អ្នកជំងឺ COVID-19 នៅមិនជាសះស្បើយ២នាក់ ម្នាក់នៅខេត្តបន្ទាយមានជ័យ និងម្នាក់ទៀតនៅកំពង់ឆ្នាំង ហើយបានបញ្ជូនមកព្យាបាលនៅមន្ទីរពេទ្យមិត្តភាពខ្មែរ-សូវៀតហើយ។ បើតាមការបញ្ជាក់ពីលោកវេជ្ជបណ្ឌិត ងី ម៉េង នាយកមន្ទីរពេទ្យមិត្តភាពខ្មែរ-សូវៀត អ្នកជំងឺទាំង២នាក់នោះ តម្រូវឲ្យព្យាបាលជំងឺប្រចាំកាយទៀត បន្ថែមពីលើ COVID-19។
លោកវេជ្ជបណ្ឌិតបានថ្លែងក្នុងសន្និសីទសារព័ត៌មានព្រឹកនេះថា ស្ត្រីអ្នកជំងឺ COVID-19 នៅខេត្តបន្ទាយមានជ័យ ក្រោយពីបញ្ជូនមកព្យាបាលនៅភ្នំពេញ នឹងតម្រូវឲ្យគ្រូពេទ្យឯកទេសផ្លូវចិត្តព្យាបាលបន្ថែមមួយមុខទៀត ដើម្បីឲ្យមានអារម្មណ៍ធូរស្រាល។
ចំណែកឯបុរសឆ្លង COVID-19 នៅកំពង់ឆ្នាំងវិញ ដោយសារលោកមានជំងឺទឹកនោមផ្អែម និងលើសឈាមប្រចាំកាយ ក៏មានគ្រូពេទ្យឯកទេសជំងឺទាំង២ព្យាបាលបន្ថែមពីជំងឺ COVID-19 ដែរ។
ស្រ្តីនៅខេត្តបន្ទាយមានជ័យ អាយុ ៣៦ឆ្នាំ បានរកឃើញវិជ្ជមាន COVID-19 កាលពីថ្ងៃទី២៩ ខែមីនា ឆ្នាំ២០២០ ឯបុរសនៅកំពង់ឆ្នាំងមានវ័យ ៧៥ឆ្នាំ បានឆ្លងវីរុស COVID-19 បន្ទាប់ពីត្រលប់មកពីចូលរួមពិធីសាសនានៅប្រទេសម៉ាឡេស៊ី កាលពីថ្ងៃទី១៧ មីនា ឆ្នាំ២០២០ដែរ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: