ហេតុអ្វីអ្នកជំងឺទឹកនោមផ្អែមចាំបាច់ត្រូវដឹងកម្រិតជាតិស្ករក្នុងឈាម?
- May 13, 2020
១- អ្វីជាកម្រិតជាតិស្ករក្នុងឈាម?
ជាតិស្ករនៅក្នុងឈាម ឬសារធាតុគ្លុយកូសក្នុងឈាម គឺសំដៅលើកម្រិតបរិមាណជាតិស្កររបស់យើងនៅក្នុងចរន្តឈាម។ ជាតិស្ករទាំងនោះ គឺមានប្រភពចេញពីអាហារ ឬភេសជ្ជៈដែលយើងញ៉ាំ និងចេញពីការបញ្ចេញសារជាតិស្ករដែលបម្រុងទុកនៅក្នុងថ្លើម និងសាច់ដុំ។ ជាតិស្ករ ឬ គ្លុយកូស គឺជាប្រភពថាមពលដ៏ចម្បងរបស់រាងកាយ។ នេះ មានន័យថា រាងកាយរបស់យើង រួមទាំងខួរក្បាលផងនោះ ពិតជាត្រូវការជាតិ គ្លុយកូស ដើម្បីអាចបំពេញមុខងាររបស់ខ្លួនបានត្រឹមត្រូវ។ ទោះជាយ៉ាងនេះក្ដី ជាតិស្ករច្រើនពេក ឬក៏តិចពេក គឺសុទ្ធតែមិនល្អ និងអាចធ្វើឲ្យគ្រោះថ្នាក់ចំពោះរាងកាយ។
២- អ្វីជាការតេស្ដតាមដានជាតិស្ករក្នុងឈាម?
ការពិនិត្យកម្រិតជាតិស្ករក្នុងឈាមរបស់យើងរាល់ថ្ងៃ គឺសំខាន់ណាស់ព្រោះថាជួយឲ្យយើងអាអាចតាមដានជំងឺទឹកនោមផ្អែមរបស់យើងបាន និងការពារពីផលវិបាកផ្សេងៗដោយសារជំងឺនេះ។ កម្រិតជាតិស្ករក្នុងឈាម គឺអាចធ្វើតេស្តបាននៅផ្ទះ ឬនៅសាលារៀន ដោយប្រើប្រដាប់វាស់ជាតិស្ករក្នុងឈាម ដែលឧបករណ៍នេះមានទំហំតូច និងអាចវាស់កម្រិតជាតិស្ករក្នុងឈាមដោយប្រើតែឈាមមួយតំណក់របស់យើង ហើយលទ្ធផលនឹងបង្ហាញលើអេក្រង់តែម្ដង។
ការធ្វើតេស្តមើលកម្រិតជាតិស្ករក្នុងឈាមជារៀងរាល់ថ្ងៃនេះ គឺជាវិធីល្អបំផុត ដើម្បីរក្សាលំនឹងរវាងអាហារដែលយើងញ៉ាំ សកម្មភាពដែលយើងត្រូវធ្វើ និងកម្រិតអាំងស៊ុយលីនដែលយើងត្រូវចាក់។
៣- សារសំខាន់នៃការពិនិត្យមើលកម្រិតជាតិស្ករ
ការពិនិត្យមើលកម្រិតជាតិស្ករគឺជាផ្នែកដ៏សំខាន់មួយ ដើម្បីថែទាំអ្នកជំងឺទឹកនោមផ្អែម។ ហេតុអ្វី? ព្រោះថា ការដឹងពីកម្រិតជាតិស្ករទាំងនោះ នឹងជួយយើងថែរក្សាខ្លួនឯង និងអាចគ្រប់គ្រងកម្រិតជាតិស្ករក្នុងឈាមបាន ដែលធ្វើ ឲ្យយើងមានអារម្មណ៍ល្អ និងធ្វើឲ្យយើងមានសុខភាពល្អ។
កុមារភាគច្រើនដែលមានជំងឺទឹកនោមផ្អែមប្រភេទ ១ តែងតែពិនិត្យមើលកម្រិតជាតិស្ករក្នុងឈាម នៅមុនញ៉ាំអាហារពេលព្រឹក មុនពេលញ៉ាំអាហារថ្ងៃត្រង់ មុនញ៉ាំអាហារល្ងាច និងបន្ទាប់មកគឺវាស់ម្ដងទៀតមុនចូលគេង។ កុមារទាំងនេះក៏ត្រូវធ្វើតេស្តកម្រិតជាតិស្ករនេះដែរ នៅពេលដែលខ្លួនមានចេញរោគសញ្ញា ធ្លាក់ចុះទាប ឬកើនឡើងខ្លាំង នៃកម្រិតជាតិស្ករ។
កុមារខ្លះទៀតត្រូវការ ការធ្វើតេស្តកម្រិតជាតិស្ករនេះ ញឹកញាប់ជាងធម្មតា។ ត្រង់ចំណុចនេះគ្រូពេទ្យ នឹងប្រាប់ទៅឪពុកម្ដាយឲ្យដឹងថាតើនៅពេលណា និង ញឹកញាប់ប៉ុនណា ដែលកូនត្រូវធ្វើតេស្តជាតិស្ករក្នុងឈាមនេះ។ កុមារខ្លះទៀតក៏អាចត្រូវការពិនិត្យមើលជាតិស្ករក្នុងឈាម មុន ឬអំឡុងពេលហាត់ប្រាណ និងបើសិនជាកុមារនោះឈឺ។
យើងប្រហែលជាឆ្ងល់ថាហេតុអីបានជាការធ្វើតេស្តពិនិត្យជាតិស្ករក្នុងឈាមនេះសំខាន់ម្ល៉េះ នៅក្នុងស្ថានភាពនេះ។ នេះ ក៏ព្រោះតែ អាហារ ថ្នាំពេទ្យ ការហាត់ប្រាណ និងជំងឺ គឺសុទ្ធតែអាចប៉ះពាល់ដល់កម្រិតជាតិស្ករ។ គ្រូពេទ្យ នឹងប្រាប់ដល់ឪពុកម្ដាយរបស់កុមារ ពីអ្វីដែលត្រូវធ្វើ បើសិនជាសកម្មភាពដែលរៀបរាប់នោះ ប៉ះពាល់ដល់កម្រិតជាតិស្ករក្នុងឈាមរបស់កុមារ។
សូមព្យាយាមស្វែង យល់ និងរៀនពីអ្វីដែលគ្រូពេទ្យប្រាប់។ ដូចនេះយើងនឹងក្លាយជាអ្នកជំនាញ ស្ដី ពីរាងកាយរបស់ខ្លួនឯង ដឹងថាតើរាងកាយផ្លាស់ប្ដូរយ៉ាងម៉េច និងប្រតិកម្មយ៉ាងម៉េច ព្រោះថារាងកាយរបស់មនុស្សម្នាក់ៗគឺមានសកម្មភាពខុសៗគ្នា ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: