ខ្លាចរលកចម្លងកូវីដ-១៩ លើកទី២ រដ្ឋមន្រ្តីក្រសួងសុខាភិបាលចេញវិធានការបន្ទាន់
- May 14, 2020
ជាការការពាររលកទី២ នៃការចម្លងវីរុស COVID-19 នៅកម្ពុជា រដ្ឋមន្ត្រីក្រសួងសុខាភិបាល ឯកឧត្ដម ម៉ម ប៊ុនហេង បានក្រើនរំលឹក និងអំពាវនាវដល់ប្រជាពលរដ្ឋទាំងអស់ ឲ្យប្រុងប្រយ័ត្ន និងការពារខ្លួនជាចាំបាច់។
ក្នុងនោះរដ្ឋមន្ត្រីក្រសួងសុខាភិបាល បានលើកឡើងថា ទោះជាប្រទេសកម្ពុជារកមិនឃើញករណីជំងឺ COVID-19 ថ្មីរយៈពេលជាងមួយខែកន្លងមកនេះក្ដី ក៏ប៉ុន្តែបុគ្គលគ្រប់រូបត្រូវប្រុងប្រយ័ត្ន និងអនុវត្តវិធានការការពារការចម្លងឲ្យបានជាប់ជានិច្ច ដោយត្រូវចេះកែប្រែទម្លាប់ និងឥរិយាបថនៃការរស់នៅរបស់ខ្លួនឲ្យស្របទៅនឹង សភាពធម្មតាតាមបែបគន្លងថ្មី ក្នុងបរិបទប្រយុទ្ធនឹងជំងឺ COVID-19 ជាចាំបាច់។
បុគ្គលគ្រប់រូបត្រូវអនុវត្តអនាម័យដៃស្អាត ពាក់ម៉ាស់ ប្រើក្រមា កន្សែង ឬក្រដាសជូតមាត់ ខ្ទប់មាត់ពេលក្អក កណ្ដាស់ បន្តអនុវត្តគម្លាតសុវត្ថិភាពសង្គម និងគម្លាតសុវត្ថិភាពបុគ្គល មិនត្រូវមានការជួបជុំ ឬរៀបចំពិធីណាមួយដែលមានគ្នាច្រើនកុះករពេក ដូចជាជួបជុំស៊ីផឹកមានគ្នាច្រើន ឬការជួបជុំបែបសាសនាជាដើម។
រីឯម្ចាស់ភោជនីយដ្ឋាន និងអាហារដ្ឋាន ព្រមទាំងកន្លែងលក់ដូរផ្សេងៗត្រូវបន្តអនុវត្តវិធានការការពារឲ្យទៅតាមបែបបទនៃការរស់នៅ “សភាពធម្មតាតាមបែបគន្លងថ្មី ក្នុងបរិបទប្រយុទ្ធនឹងជំងឺ COVID-19” នៅកម្ពុជា ដូចបានជម្រាប ប្រកបដោយការទទួលខុសត្រូវ និងត្រូវធានាទីតាំងធុរកិច្ចរបស់ខ្លួនមិនត្រូវក្លាយជាទីកន្លែងចម្លង COVID-19 ដល់អតិថិជន ឬអ្នកបម្រើការនៅទីនោះឡើយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: