អ្នកជំងឺជាអស់ អត់មានអ្នកឆ្លងថ្មីទៀត តែកុំច្រឡំថា កម្ពុជាអស់កូវីដ-១៩
- May 19, 2020
អ្នកឆ្លងជំងឺ COVID-19 ទាំង១២២នាក់បានជាសះស្បើយអស់ ហើយប៉ុន្មានថ្ងៃមកនេះក៏គ្មានអ្នកឆ្លងថ្មីដែរ តែកុំយល់ច្រឡំថា COVID-19 ចាកចេញអស់ពីកម្ពុជានោះ នេះជាការបញ្ជាក់របស់លោកជំទាវ ឱ វណ្ណឌីន រដ្ឋលេខាធិការ ក្រសួងសុខាភិបាល។ លោកជំទាវបានពន្យល់ថា ករណីអ្នកជំងឺ COVID-19 ទាំង១២២នាក់ ដែលបានព្យាបាលជាអស់ មិនមានករណីថ្មីមកទល់ថ្ងៃនេះ ហើយមិនមានអ្នកស្លាប់នេះ ជាសញ្ញាបង្ហាញពីប្រសិទ្ធភាព នៃអន្តរាគមន៍របស់ក្រសួងក្នុងការចាត់ចែងទប់ស្កាត់ កុំឲ្យមានការទប់ស្កាត់ការរីករាលដាល COVID-19 នៅក្នុងសហគមន៍មានប្រសិទ្ធភាពល្អ គួរជាទីមោទនភាពបំផុតប៉ុណ្ណោះ។ ប៉ុន្តែកម្ពុជានៅតែមានហានិភ័យ នៃការចម្លងវីរុស COVID-19 នៅឡើយទេ។
“ស្ថានភាពរបស់យើងគឺស្ថិតនៅក្នុងស្ថានភាពប្រុងប្រយ័ត្ន រវៀសរវៃជាប់ជានិច្ច ដោយសារនៅសាកលលោក និងប្រទេសក្នុងតំបន់ នៅមានការឆ្លងវីរុស COVID-19 នៅឡើយទេ”។
អ្នកនាំពាក្យក្រសួងសុខាភិបាលរូបនេះបានបន្តថា ហានិភ័យនៃការចម្លង គឺមានគ្រប់ពេលវេលា គ្រប់ទីកន្លែងទាំងអស់ បែបនេះទើបតម្រូវឲ្យពលរដ្ឋរស់នៅធម្មតា ប៉ុន្តែតាមបែបគន្លងថ្មីឲ្យខ្ជាប់ខ្ជួន។
១. អនុវត្តនូវអនាម័យ ពិសេសដៃ ត្រូវលាងសម្អាតឲ្យញឹកញាប់
២. ត្រូវប្រើម៉ាសក្នុងករណីចាំបាច់ បើក្អក ឬកណ្តាស់ ត្រូវប្រើក្រដាស ឬក្រម៉ា ខ្ទប់ច្រមុះមាត់
៣. រក្សាគម្លាតសុវត្ថិភាពសង្គម និងបុគ្គល។
ក្រោយពីមានការព្យាបាលអ្នកជំងឺ COVID-19 ជាសះស្បើយអស់នៅកម្ពុជានេះដែរ រដ្ឋបាលរាជធានីភ្នំពេញ សង្កេតឃើញថា ពលរដ្ឋមិនមានការភ័យខ្លាច និងបាត់ការប្រុងប្រយ័ត្នចំពោះជំងឺ COVID-19 ហើយនៅតាមភោជនីយដ្ឋាន និងអាហារដ្ឋានមួយចំនួនខ្វះការប្រុងប្រយ័ត្នទាំងម្ចាស់ភោជនីយដ្ឋាន និងភ្ញៀវដោយពុំមានអនុវត្តតាមការណែនាំរបស់ក្រសួងសុខាភិបាល។
នៅក្នុងសេចក្តីជូនដំណឹងដែលរដ្ឋបាលរាជធានីភ្នំពេញ បានណែនាំឲ្យម្ចាស់ភោជនីយដ្ឋាន និងអាហារដ្ឋានទាំងអស់ ត្រូវរៀបចំឲ្យមានអាល់កុល ឬជែលលាងដៃ នៅមុខច្រកចេញចូល និងត្រូវចាត់តាំងបុគ្គលិកវាស់កម្តៅភ្ញៀវ មុននឹងអនុញ្ញាតឲ្យចូល ត្រូវរក្សាគម្លាតសង្គមឲ្យបានត្រឹមត្រូវ តាមការណែនាំរបស់ក្រសួងសុខាភិបាល។ ក្នុងករណីមិនធ្វើតាម រដ្ឋបាលរាជធានីភ្នំពេញនឹងបិទអាជីវកម្មភោជនីយដ្ឋាន និងអាហារដ្ឋាននោះជាបណ្តោះអាសន្ន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: