ក្រសួងសុខាភិបាលត្រៀមវិទ្យាល័យ ហ៊ុន សែន ជម្ពូវ័ន ជាកន្លែងពិនិត្យអ្នកដំណើរមកពីបរទេស
- June 3, 2020
រដ្ឋលេខាធិការក្រសួងសុខាភិបាល លោកជំទាវ យក់ សម្បត្ដិ បានប្រាប់សារព័ត៌មាន freshnews នៅថ្ងៃនេះថា អ្នកដំណើរមកពីក្រៅប្រទេសនានា ត្រូវរៀបចំឲ្យទៅកន្លែងពិនិត្យនៅទីតាំងវិទ្យាល័យ ហ៊ុន សែន ជម្ពូវ័ន។
លោកជំទាវ យក់ សម្បត្តិ បានបន្តទៀតថា មន្ត្រីក្រុមការងារអន្តរក្រសួង បានធ្វើការងារជាមួយសាលារាជធានីភ្នំពេញ ទៅពិនិត្យទីតាំងវិទ្យាល័យ ហ៊ុន សែន ជម្ពូវ័ន កាលពីម្សិលមិញរួចហើយ ដើម្បីត្រៀមរៀបចំទទួលអ្នកដំណើរមកពីបណ្ដាប្រទេសនានា ក្នុងនោះ មានពលករខ្មែរធ្វើការនៅប្រទេសកូរ៉េផងដែរ ដោយក្នុងចំណោម ៦ ជើងហោះហើរនៅថ្ងៃនេះ។
ដើម្បីការពារទប់ស្កាត់ជំងឺ COVID-19 ចូលមកកម្ពុជា ដោយកន្លងមកអ្នកជំងឺ COVID-19 សុទ្ធសឹងតែជាករណីនាំចូល ក្រសួងសុខាភិបាល និងស្ថាប័នពាក់ព័ន្ធបានត្រៀមវិទ្យាល័យ ហ៊ុន សែន ជម្ពូវ័ន មួយកន្លែងបន្ថែមទៀត សម្រាប់ត្រួតពិនិត្យសុខភាពអ្នកដំណើរពីក្រៅប្រទេស ត្រលប់ចូលមកកម្ពុជាវិញ តាមអាកាសយានដ្ឋានអន្តរជាតិភ្នំពេញ។
កន្លងមកនៅរាជធានីភ្នំពេញមានកន្លែងត្រួតពិនិត្យសុខភាព នៅក្នុងទ័ពអាកាស ជាប់អាកាសយានដ្ឋានអន្តរជាតិភ្នំពេញ ដែលមានចំនួន ១០០ គ្រែ និងមណ្ឌលសុខភាពនៅចាក់អង្រែក្រោមចំនួន ១០០ គ្រែ ហើយសម្រាប់វិទ្យាល័យ ហ៊ុន សែន ជម្ពូវ័ន មានចំនួន ២០០ គ្រែ ដូចនេះចំនួនសរុបមានចំនួន ៤០០ គ្រែ សម្រាប់ទទួលអ្នកដំណើរ ដែលត្រូវមកពិនិត្យសុខភាព។
ប្រភពអត្ថបទ និងរូបភាពយកពី freshnews
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្តល់សិទ្ធិដោយ៖ Helloគ្រូពេទ្យ
- Share This Post: