ពេជ្រ សូលីកា បកស្រាយច្បាស់ៗ ជុំវិញព័ត៌មានដែលគេចុះផ្សាយដាក់ចំណងជើងធំៗថា «ពេជ្រ សូលីកា ទាន់ប្តីដេកជាមួយស្រី លែងលះទាំងមានផ្ទៃពោះ»

កាលពីខែឧសភា កន្លងទៅ តារាចម្រៀងរូបស្រស់ អ្នកនាង ពេជ្រ សូលីកា បានសម្រាលបានកូនប្រុសស្រស់ស្អាតម្នាក់ ហើយមហាជន ជាពិសេសអ្នកគាំទ្រអ្នកនាង បាននាំគ្នាអបអរសាទរយ៉ាងខ្លាំង ចំពោះសមាជិកថ្មីរបស់អ្នកនាង។ ទើបតែសម្រាលកូនមិនទាន់បានប៉ុន្មានផង ស្រាប់តែពេលថ្មីៗ អ្នកនាង ពេជ្រ សូលីកា មានការខឹងសម្បាយ៉ាងខ្លាំង ចំពោះសារព័ត៌មាន ដែលចុះផ្សាយដាក់ចំណងជើងធំៗថា «ពេជ្រ សូលីកា ទាន់ប្តីដេកជាមួយស្រី លែងលះទាំងមានផ្ទៃពោះ»។

ចំពោះករណីព័ត៌មានចុះផ្សាយបែបនេះដែរ អ្នកនាង ពេជ្រ សូលីកា ក៏បានធ្វើការបកស្រាយទាំងអារម្មណ៍មិនពេញចិត្តថា​៖ “«សុំអភ័យទោសទុកជាមុន បើសិនជាមានការខុសឆ្គង ៖ ក្នុងនាមខ្ញុំជាអ្នកសិល្បះក្នុងស្រុកមួយរូប នាងខ្ញុំពិតជាមានការសោកស្ដាយចំពោះចំណេះដឹងរបស់បុគ្គលសារព័ត៌មានមួយចំនួនតូច ដែលខ្លួនជាបុគ្គលផ្សព្វផ្សាយទៅដល់សង្គម ហេតុផលដែលនាងខ្ញុំចង់លើកយកមកនិយាយនៅថ្ងៃនេះ

1. បើគ្មានចំណេះដឹងសូមកុំធ្វើជាអ្នកយកព័ត៌មាន ព្រោះវាធ្វើឲ្យខូចឈ្មោះដល់អ្នកសារព័ត៌មានដទៃទៀតបាន
2. ខ្លួនគឺជាបុគ្គលដែលចែករំលែកទៅដល់សង្គម បើគ្រាន់តែការសរសេរចំណងជើងក៏មិនត្រូវដែរ វាពិតជាអន់ជាងក្មេងរៀនថ្នាក់មតេ្តយ្យទៅទៀត
3. កុំដោយសារតែផលប្រយោជន៍របស់ខ្លួន ដល់ថ្នាក់មិនចេះបែងចែកអ្វីខុសនឹងអ្វីត្រូវ

ជាចុងក្រោយនេះនាងខ្ញុំសូមជូនដំណឹងមួយនេះទៅដល់ Mr.Phnompenhthmey ដើម្បីជួយកែសម្រួលជាមួយចំណងជើងជាបន្ទាន់ សុំបងប្អូនជួយ Share ដំណឹងនេះអោយបានទៅដល់សារព័ត៌មានកំពូលមួយនេះផង ដោយក្ដី គោរព នឹង ស្រលាញ់ ពីនាងខ្ញុំ!»៕”