ជំងឺផ្ដាសាយជ្រូកថ្មីនៅចិន មានលក្ខណៈស្រដៀងវីរុសផ្ដាសាយរាតត្បាតខ្លាំងកាលឆ្នាំ ១៩១៨
- July 2, 2020
មន្ត្រីសុខាភិបាលសហរដ្ឋអាមេរិកកំពុងតាមដានមើលជំងឺផ្ដាសាយជ្រូកថ្មីដែលគេរកឃើញនៅលើសត្វជ្រូកនៅប្រទេសចិនដែលមានលក្ខណៈដូចទៅនឹង វីរុស H1N1 ដែលផ្ទុះឡើងកាលពីឆ្នាំ ២០០៩ និងជំងឺផ្ដាសាយរាតត្បាតកាលពីឆ្នាំ ១៩១៨ នេះបើយោងតាមលោកវេជ្ជបណ្ឌិត Anthony Fauci ទីប្រឹក្សាវីរុសកូរ៉ូណាសហរដ្ឋអាមេរិក។
វីរុសផ្ដាសាយជ្រូកថ្មីដែលអ្នកវិទ្យាសាស្ត្រដាក់ឈ្មោះថា G4 EA H1N1 នៅមិនទាន់មានការឆ្លងមកកាន់មនុស្សទេ ប៉ុន្តែវីរុសមានលទ្ធភាពឆ្លងមកមនុស្សបាន ហើយក៏អាចបង្កជាជំងឺរាតត្បាតបាន ដោយសារមានការប្រែប្រួលហ្សែន។ គេរកឃើញវីរុសថ្មីនេះ មានលក្ខណៈដូចទៅនឹងវីរុស H1N1 និងមានលក្ខណៈខ្លះដូចវីរុសផ្ដាសាយកើតកាលពីឆ្នាំ ១៩១៨ ដែលរាល់វីរុសផ្ដាសាយទាំងអស់គឺសុទ្ធតែមានសេសសល់លក្ខណៈខ្លះរបស់វីរុសចាស់នេះ រួមទាំងបំណែកផ្សេងទៀតពីភ្នាក់ងារផ្ទុកវីរុសដូចជាសត្វជ្រូកជាដើម។
ជំងឺផ្ដាសាយជ្រូក H1N1 និងជំងឺផ្ដាសាយឆ្នាំ ១៩១៨ សុទ្ធតែជាជំងឺរាតត្បាតដែលគួរឲ្យខ្លាច។ ជំងឺផ្ដាសាយជ្រូក H1N1 កើតមានឆ្លងលើកដំបូងនៅប្រទេសម៉ិកស៊ីកូនៅខែមេសា ឆ្នាំ ២០០៩ ដែលមានអ្នកឆ្លងយ៉ាងតិច៧០០ លាននាក់ទូទាំងពិភពលោក និងមានអ្នកស្លាប់ចន្លោះពី ១៥១ ៥០០ ទៅ៥៧៥ ៤០០ នាក់។ បច្ចុប្បន្នគេចាត់ទុកជំងឺនេះគឺជាប្រភេទមួយនៃជំងឺផ្ដាសាយតាមរដូវ។
ចំណែកឯជំងឺផ្ដាសាយកើតកាលឆ្នាំ ១៩១៨ បានសម្លាប់មនុស្សចន្លោះ ៣០ ទៅ ៥០ លាននាក់។ អ្នកវិទ្យាសាស្ត្រក៏បានលើកឡើងថាវីរុសផ្ដាសាយជ្រូកថ្មីដែលឆ្លងក្នុងកសិដ្ឋានជ្រូកនៅប្រទេសចិនគឺមានលក្ខណៈអាចក្លាយជាជំងឺរាតត្បាតបាន។
លោក Fauci បានបន្តទៀតថាជំងឺនេះអាចផ្ទុះឡើងជាជំងឺផ្ដាសាយជ្រូកប្រភេទថ្មី ដូចដែលធ្លាប់មានកាលពីឆ្នាំ២០០៩។ លោកបន្តថាទោះបីជាពេលនេះកំពុងស្ថិតក្នុងដំណាក់កាលតាមដាន និងមិនទាន់ក្លាយជាការគំរាមកំហែងក៏ដោយ ប៉ុន្តែនេះជាអ្វីដែលត្រូវបន្តយកចិត្តទុកដាក់ដូចដែលបានធ្វើពេលផ្ទុះជំងឺផ្ដាសាយជ្រូកកាលពីឆ្នាំ២០០៩។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
- Share This Post: