ភ្នំពេញ ៖ មុននេះបន្តិចនៅលើបណ្ដាញទំនាក់ទំនងសង្គមហ្វេសប៊ុកបានឱ្យដឹងថា ម្តាយតារាចម្រៀងត្រកូលអោកទាំងបួន បានទទួលមរណភាពទៅហើយ ដោយតារាចម្រៀងស្រីត្រកូលអោកទាំងបួន​ និងក្រុមគ្រួសារ​ បានផ្លាស់ប្ដូររូបភាពនៅលើប្រូហ្វាលហ្វេសប៊ុករបស់ខ្លួនដាក់រូបកាន់ទុក្ខយ៉ាងក្រៀមក្រំបន្តបន្ទាប់គ្នា បង្កប់ដោយទឹកមុខសោកសៅ សោកស្ដាយចំពោះការលាចាកលោករបស់អ្នកម្ដាយជាទីស្រលាញ់ គ្មានថ្ងៃត្រឡប់មកវិញនោះឡើយ។

គួរបញ្ជាក់ផងដែរថា អ្នកម្ដាយរបស់តារាចម្រៀង​ត្រកូលអោកទាំងបួន មានឈ្មោះ​ ទីវ​ សោភណ្ឌ​ បានទទួលមរណភាព តាំងពីវេលាម៉ោង០២:៤៥នាទីរំលងអធ្រាត្រ​ ឈានចូលថ្ងៃសុក្រ ទី២៤ ខែកក្កដា​ ឆ្នាំ២០២០នេះ​ ដោយ​រោគាពាធ​ ក្នុង​ជន្មាយុ​៥៩ឆ្នាំ ។

បច្ចុប្បន្នសពរបស់គាត់​ត្រូវបានក្រុមគ្រួសារត្រកូលអោក​ ដឹកមកចាត់ចែងតម្កល់ធ្វើបុណ្យតាមប្រពៃណី នៅវត្ត​វាលស្បូវ​ ផ្លូវជាតិលេខ១ សង្កាត់វាលស្បូវ​ ខណ្ឌច្បារអំពៅ​ រាជធានីភ្នំពេញ​ ។ នេះបើតាមសម្ដី​តារាចម្រៀង​ អោក​ សុម៉ាវត្តី​ បានប្រាប់អោយក្រុមការងារខ្មែរណូតបានដឹងនៅព្រឹក​ ថ្ងៃទី២៤ ខែកក្កដា​ ឆ្នាំ២០២០នេះ​ ។

អាស្រ័យ​ហេតុនេះ សូមបងប្អូនញាតិមិត្តជិតឆ្ងាយ លោក-លោក លោកស្រី និងមិត្តៗសិល្បករទាំងអស់ ដែលស្រលាញ់និងរាប់អានតារាចម្រៀងក្រកូលឱកទាំងបួន ចូលរួមពិធីបុណ្យ ទាំងអស់គ្នាផង​​ ដើម្បីជាការចូលរួមរំលែកទុក្ខ​ គោរព​វិញ្ញាណក្ខន្ធ​របស់គាត់​ និងជូនដំណើរ​គាត់ជាលើកចុងក្រោយផង៕​

ដោយ៖ បងម៉េង​ ខ្មែរណូត