ឃាត់ខ្លួនចោរឆក់ខ្សែករនារីម្នាក់ជិះម៉ូតូរត់គេចខ្លួនទាំងភ័យទៅបុកម៉ូតូអ្នកដំណើរ ត្រូវសមត្ថកិច្ចវាយខ្នោះបានសម្រេច

រាជធានីភ្នំពេញ៖ ជនសង្ស័យម្នាក់​ ក្រោយពីធ្វេីសកម្មភាពឆក់ខ្សែករ​ ពីស្ត្រីម្នាក់បានសម្រេច​ ក្រោយមកក៏បានជិះម៉ូតូរត់គេចខ្លួន​ តែជនសង្ស័យរូបខាងលេី​ ភ័យក៏បើកម៉ូតូជុលទៅបុកនិងម៉ូតូអ្នកធ្វើដំណើរតាមផ្លូវបណ្ដាលឲ្យដួល​ ក៏ត្រូវសមត្ថកិច្ចឃាត់ខ្លួនបានតែម្តង។ ហេតុការណ៍នេះបានកេីតឡេីងកាលពីវេលាម៉ោង​ ៧និង០០នាទីព្រឹក​ ថ្ងៃទី១០​ ខែវិច្ឆិកា​ ឆ្នាំ​២០២០​ ដែលស្ថិតនៅចំណុចផ្លូវ២៧៤ កែង២០៥ ក្រុម៣៣ ភូមិ៥​ សង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ។

ជនសង្ស័យឈ្មោះ ចាន់ មនោរង្សី ភេទប្រុស អាយុ​២៧ឆ្នាំ​ ជនជាតិខ្មែរ មុខរបរ​ដឹកអនឡាញ​ (ប្រើប្រាស់នូវសារធាតុញៀន​)​ ស្នាក់នៅផ្ទះលេខ២៦ ផ្លូវ២១៨ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។ ចំណែកឯជនរងគ្រោះឈ្មោះ លាងអុី ភេទស្រី អាយុ២៧ឆ្នាំ ជនជាតិខ្មែរ មុខរបរ​លក់បន្លែ​ ស្នាក់នៅផ្ទះជួល ភូមិពោធិញៀន សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។ វត្ថុតាងចាប់យករួមមាន៖​ ម៉ូតូ មួយគ្រឿង​ ម៉ាកស្កុបពី ពណ៌ខ្មៅ ពាក់ផ្លាកលេខ ភ្នំពេញ 1IL-1681 (ជាមធ្យោបាយធ្វើសកម្មភាពរបស់ជនសង្ស័យ),​ ទូរស័ព្ទ​ មួយគ្រឿង ម៉ាក oppo ពណ៌ស្វាយ,​ ខ្សែករលោហធាតុពណ៌លឿងទុំ​ បន្តោងគ្រប់មូល ចំនួន​មួយខ្សែ ជារបស់ជនរងគ្រោះដែលដកហូតពីជនសង្ស័យ ហេីយបានប្រគល់ឲ្យជនរងគ្រោះវិញ​។

នៅមុនកើតហេតុថ្ងៃទី១០​ ខែវិច្ឆិកា ឆ្នាំ២០២០ វេលាម៉ោង​ ៧និង០០នាទី ជនរងគ្រោះ បានជិះម៉ូតូ​ មួយគ្រឿង​ម៉ាក​ PCX ពណ៌ស​ ពាក់ផ្លាក់លេខ​ ភ្នំពេញ 1HJ-9779 ចេញពីកន្លែងលក់បន្លែ​ ក្នុងគោលបំណងយករម៉កទៅផ្ញើរនៅសាលារៀន ពេលជនរងគ្រោះជិះម៉ូតូមកដល់ចំនុចផ្លូវលេខ២៧៤ កែង២០៥ ក្រុម៣៣ ភូមិ៥ សង្កាត់ទួលស្វាយព្រៃទី២ ស្រាប់តែមានជនសង្ស័យម្នាក់​ ជិះម៉ូតូ មួយគ្រឿង​ ម៉ាក់ស្ដុបពី ពណ៌ខ្មៅ ពាក់ផ្លាកលេខ​ភ្នំពេញ 1IL-1681 ជិះមកពីក្រោយ​ជនរងគ្រោះ រួចធ្វើសកម្មភាពលូកដៃឆ្វេងឆក់យកខ្សែកររបស់ជនរងគ្រោះបានសម្រេចរួចជិះម៉ូតូគេចខ្លួន ភ្លាមៗនោះ​ជនរងគ្រោះ​ ក៏បានស្រែកចោរៗ ខណ:នោះ​ជនសង្ស័យភ័យក៏បើកម៉ូតូជុលទៅបុកជាមួយនិងម៉ូតូអ្នកធ្វើដំណើរតាមផ្លូវបណ្ដាលឲ្យដួលបន្ទាប់មកកម្លាំងសមត្ថកិច្ចប៉ុស្តិ៍ដែលល្បាត​ បា​នទៅដល់កន្លែងកើតហេតុ​ នឹងបានធ្វើការឃាត់ខ្លួនជនសង្ស័យខាងលេី​ រួមនិងវត្ថុតាងយកមកប៉ុស្ដិ៍នគរបាលរដ្ឋបាលទួលស្វាយព្រៃទី២ ដើម្បីសាកសួរតែម្ដង។

បច្ចុប្បន្ន ជនសង្ស័យខាងលេី​រួមនិងវត្ថុតាង ត្រូវកម្លាំងសមត្ថកិច្ច​ បញ្ជូនខ្លួនទៅកាន់អធិការដ្ឋាននគរបាលខណ្ឌបឹងកេងកង ដើម្បីធ្វើការសាកសួរបន្ដ និងចាត់ការតាមនិតិវិធីច្បាប់ ៕

ប្រភព៖ អធិការដ្ឋាននគរបាលខណ្ឌបឹងកេងកង