ប្រទេសថៃកត់ត្រាករណីជំងឺកូវីដ១៩ ថ្មីចំនួន ២១ករណី បូករួមទាំងពលរដ្ឋថៃ ៩នាក់ ដែលត្រឡប់មកពីប្រទេសភូមា

យោងតាមការចុះផ្សាយរបស់សារព័ត៌មាន បាងកកប៉ុស្ដិ៍ នៅថ្ងៃច័ន្ទ ទី០៧ ខែធ្នូ ឆ្នាំ២០២០ បានឱ្យដឹងថា ប្រទេសថៃបានកត់ត្រាករណីជំងឺ COVID-19 ថ្មីចំនួន ២១ករណី នៅថ្ងៃនេះ រួមទាំងជនជាតិថៃ ៩នាក់ ដែលបានត្រឡប់មកពីប្រទេសភូមា ដែលនាំឱ្យចំនួនករណីសរុបមាន ៤ ១០៧ ចាប់តាំងពីការផ្ទុះបានចាប់ផ្តើម។ មិនមានសេចក្តីរាយការណ៍អំពីការស្លាប់ថ្មីទេ ដែលធ្វើឱ្យចំនួនអ្នកស្លាប់មាន ៦០នាក់ ដដែល។ មជ្ឈមណ្ឌលសម្រាប់រដ្ឋបាលស្ថានភាពជំងឺ COVID-19 បាននិយាយថា ករណីថ្មីនេះមានជនជាតិថៃចំនួន ១៥នាក់ និងជនបរទេស ៦នាក់។

ពលរដ្ឋថៃដែលត្រឡប់ពីប្រទេសភូមាទាំង ៩នាក់ ធ្វើការនៅសណ្ឋាគារ 1G1-7 ក្នុងទីក្រុង Tachileik ដែលករណីជំងឺ COVID-19 ថ្មីៗទាក់ទងនឹងពលរដ្ឋថៃដែលត្រឡប់មកពីតំបន់នោះ មានការកើនឡើងគួរឱ្យកត់សម្គាល់។ យ៉ាងណាមិនដូចជនភៀសខ្លួនពីមុនទេ ពួកគេបានចូលស្រុក Mae Sai ខេត្តឈៀងរ៉ៃ តាមរយៈប៉ុស្តិ៍ត្រួតពិនិត្យផ្លូវការ ហើយត្រូវបានធ្វើតេស្តភ្លាមៗ។ លទ្ធផលនៃការធ្វើតេស្តរបស់ពួកគេកាលពីថ្ងៃសុក្រគឺវិជ្ជមាន ហើយពួកគេទាំងអស់កំពុងទទួលការព្យាបាលនៅឯមន្ទីរពេទ្យ Chiang Rai Prachanukroh ក្នុងស្រុកមឿង។

ជនជាតិថៃ ៦នាក់ផ្សេងទៀត ដែលបានវិជ្ជមានជាមួយជំងឺ COVID-19 គឺជាអ្នកបានមកដល់ប្រទេសថៃតាមផ្លូវអាកាស ដោយមាន ៤នាក់ មកពីចក្រភពអង់គ្លេស និង ២នាក់ មកពីសាំងហ្គាពួរ។ ជនបរទេសដែលត្រូវបានរកឃើញថាបានឆ្លងវីរុសនេះ គឺមានពលរដ្ឋអាមេរិក ២នាក់ និង មកពីអេស្តូនី ១នាក់ ឥណ្ឌា ១នាក់ អាល្លឺម៉ង់ ១នាក់ និងអារ៉ាប់រួម ១នាក់៕

អត្ថបទ៖ លីដា
ប្រភព៖ បាងកកប៉ុស្ដិ៍