អ្នកនាំពាក្យក្រសួងអប់រំ៖ មិនអាចបើកដំណើរសាលារៀនសាធារណៈ និងឯកជនបានទេដោយសារព្រឹត្តិការណ៍សហគមន៍២០កុម្ភៈ មិនទាន់ចប់
យោងតាមការចុះផ្សាយរបស់ ក្រសួងព័ត៌មាន បានឲ្យដឹងថា ស្របពេលដែលមានការស្នើសុំពីវិស័យឯកជនក្នុងការជំរុញឱ្យបើកដំណើរការសាលារៀនឯកជនឡើងវិញក្នុងរយៈពេលឆាប់ៗនេះយ៉ាងណាក្តី អ្នកនាំពាក្យក្រសួងអប់រំយុវជន និង កីឡាបានប្រកាសថា នឹងនៅតែបន្តបិទសាលារៀន ទាំងរដ្ឋ និងឯកជនបន្តទៀត ដោយសារព្រឹត្តិការណ៍នៃការផ្ទុះជំងឺកូវីដ១៩ សហគមន៍២០កុម្ភៈ គឺមិនទាន់ចប់នៅឡើយ។
ឯកឧត្ដម រស់ សុវាចា អ្នកនាំពាក្យក្រសួងអប់រំ យុវជន និងកីឡាបានបញ្ជាក់ឱ្យដឹងនៅថ្ងៃទី១៧ ខែមិថុនា ឆ្នាំ២០២១នេះថា ក្រសួងអប់រំស្វាគមន៍ និងថ្លែងអំណរគុណចំពោះ កិច្ចសហការពីសំណាក់ក្រសួង-ស្ថាប័នពាក់ព័ន្ធ ដៃគូរអភិវឌ្ឍន៍ វិស័យឯកជន ជាពិសេសមាតាបិតា សិស្ស-និស្សិត និងអាជ្ញាធរមូលដ្ឋាន ក្នុងការចូលរួមចំណែកលើកកម្ពស់គុណភាពអប់រំសម្រាប់អ្នកសិក្សាមុន និងក្នុងបរិបទកូវីដ-១៩។ ឯកឧត្ដមថ្លែងបញ្ជាក់ថា “ក្រសួងអប់រំ យុវជន និងកីឡា មានជំហរបន្តផ្អាកគ្រឹះស្ថានសិក្សាសាធារណៈ និងឯកជននៅទូទាំងប្រទេសដោយបន្តតាមដាន និងវាយតម្លៃស្ថានភាពព្រឹត្តិការណ៍សហគមន៍ ២០ កុម្ភៈ។ ចំពោះមុខនេះ ក្រសួងអប់រំ យុវជន និងកីឡាលើកទឹកចិត្តគ្រប់ភាគីពាក់ព័ន្ធ ជាពិសេសបុគ្គលិកអប់រំ មាតាបិតា សិស្ស-និស្សិត បន្តអនុវត្តន៍ឱ្យបានខ្ជាប់ខ្ជួននូវវិធានការ ៣ការពារ ៣កុំ”។
ឯកឧត្ដមបានអះអាងថា គ្រឹះស្ថានសិក្សាសាធារណៈ និងឯកជនត្រូវបន្តការបង្រៀន និងរៀនពីចម្ងាយ និងតាមអនឡាញស្របតាមគន្លងជីវិតថ្មីនៃវិស័យអប់រំ។ ទន្ទឹមនេះ ក្រសួងអប់រំបានចេញរួចហើយនូវសេចក្តីណែនាំស្ដីពីការបង្រៀន និងរៀនពីចម្ងាយ និងតាមប្រព័ន្ធអេឡិចត្រូនិក សម្រាប់គ្រឹះស្ថានបឋមសិក្សា និងមធ្យមសិក្សាសាធារណៈ ឆ្នាំសិក្សា ២០២០-២០២១។ ឯកឧត្ដមបន្ថែមថា ក្រសួងអប់រំ យុវជន និងកីឡា នឹងចេញសេចក្តីណែនាំស្ដីពីការបង្រៀន និងរៀនពីចម្ងាយតាមប្រព័ន្ធអេឡិចត្រូនិកសម្រាប់គ្រឹះ ស្ថានសិក្សាឯកជនឆ្នាំសិក្សា ២០២០-២០២១។
ឯកឧត្ដមក៏បានជំរុញឱ្យភាគីពាក់ព័ន្ធទាំងអស់បន្តអនុវត្តន៍វិធានការ ៣ការពារ ៣កុំ ឱ្យបានខ្ជាប់ខ្ជួន ហើយក្រសួងអប់រំ យុវជន និងកីឡា លើកទឹកចិត្តដល់អ្នកផ្តល់សេវាអប់រំឯកជន អ្នកទទួលសេវាអប់រំឯកជន និងភាគីពាក់ព័ន្ធបន្តពិភាក្សាគ្នា ចរចាគ្នា រកដំណោះស្រាយសមស្រប ប្រកបដោយការយោគយល់គ្នាកម្រិតខ្ពស់ និងសម្បទាន គ្នាទៅវិញទៅមក ព្រោះទាំងអស់គ្នាសុទ្ធតែទទួលផលជះពីកូវីដ-១៩។ ទន្ទឹមនេះ ក្រសួងអប់រំ គោរពអនុវត្តន៍តាមគោលការណ៍នានា របស់រាជរដ្ឋាភិបាល។
សូមរម្លឹកផងដែរថា កាលពីថ្ងៃទី១៦ ខែមិថុនា ឆ្នាំ២០២១ ឯកឧត្ដមបណ្ឌិត ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា និងជានាយកវិទ្យាស្ថានវ៉ាន់ដាគណនេយ្យបានដាក់សំណើចំនួន៧ចំណុចទៅក្រសួងអប់រំ យុវជន និងកីឡា ដើម្បីជួយដោះស្រាយក្នុងនោះរួមមាន៖
ទី១. សំណើសុំបើកសាលារៀនឡើងវិញដោយថ្នាក់ឧត្តមសិក្សា និងថ្នាក់ k-12 រៀនជាលក្ខណៈ online plus ដូចគ្នាដែលមានការទទួលខុសត្រូវរបស់សាលានីមួយៗជាមួយនឹងការគោរពតាមគោលការណ៍ស្តង់ដារ វិធានការ អនាម័យរបស់ក្រសួងអប់រំយុវជននិងកីឡា និងស្នើកំណត់ថ្ងៃប្រឡងបាក់ឌុប។
ទី២. សំណើសុំបិទត្រឹមទីតាំងដែលកើតមានជំងឺកូវីដ១៩ ឬទីតាំងដែលសង្ស័យដែលកើតមានជំងឺកូវីដ១៩ ចំពោះតែថ្នាក់ឬទីតាំងជាក់លាក់ណាមួយដែលមានកើតជំងឺកូវីដ១៩ ឬដែល សង្ស័យកើតជំងឺកូវីដ១៩ ជាជាងការបិទសាលាទាំងមូលតែម្ដង។
ទី៣. សំណើសុំចាក់វ៉ាក់ សាំងឱ្យបានពេញលេញចំពោះសិស្ស និស្សិត និងបុគ្គលិកអប់រំផ្នែកឯកជនជាពិសេស ចំពោះ សិស្ស និស្សិត និងបុគ្គលិកអប់រំផ្នែកឯកជននៅតាមបណ្ដាខេត្តនានា ដើម្បីកាត់ បន្ថយហានិភ័យនៃការឆ្លងជំងឺកូវីដ១៩ ដែលការចាក់វ៉ាក់សាំងនោះអាចធ្វើបាននៅតាម ទីតាំងសាលាផ្ទាល់តែម្ដង។
ទី៤. សំណើសុំធនាគារជាតិនៃកម្ពុជាបន្ថយអត្រាការប្រាក់ ពិសេសស្នើសុំបន្ថយអត្រាការប្រាក់កាតព្វកិច្ចចំពោះធនាគារឯកជន ដើម្បីឱ្យធនាគារ ឯកជនមានលទ្ធភាពបន្ថយអត្រាការប្រាក់មកដល់គ្រឹះស្ថានអប់រំឯកជន និងស្នើសុំពន្យារ ពេល នៃការសងត្រឡប់វិញ។
ទី៥. សំណើសុំផ្អាកការបង់ថ្លៃសេវាបេឡាជាតិ របបសន្តិ សុខសង្គម(ប.ស.ស) និងអាចទទួលបានអត្ថប្រយោជន៍ដែលផ្ដល់ដោយ ប.ស.ស ជា ធម្មតា។
ទី៦. សំណើសុំបង្កើតល្បឿនអ៊ីនធើណិតសម្រាប់វិស័យអប់រំដោយស្នើសុំ ក្រសួង ប្រៃសណីយ៍និងទូរគមនាគមន៍បង្កើនល្បឿន អ៊ិនធើណិតឱ្យបានលឿនសម្រាប់វិស័យអប់រំ ដើម្បីឆ្លើយតបឱ្យបានល្អប្រសើរចំពោះការប្រើប្រាស់ក្នុងការរៀនតាមអនឡាញរបស់សិស្សនៅក្នុងបរិបទនៃជំងឺកូវីដ១៩។ ចំណុចទី៧. សំណើសុំព្យួរការបង់ពន្ធកាត់ទុកលើប្រាក់ បៀវត្សរ៍ បុគ្គលិកអប់រំផ្នែកឯកឯកជនបើអាចបន្ធូរបន្ថយត្រឹមរយៈពេល ៦ខែ។
ជាមួយគ្នានោះដែរ ឯកឧត្ដមបណ្ឌិត ហេង វ៉ាន់ដា បានលើកឡើងជុំវិញដំណើរការរបស់គ្រឹះស្ថានអប់រំឯកជននៅកម្ពុជានាពេលនេះថា កំពុងយ៉ាប់យ៉ឺនខ្លាំងណាស់ ព្រោះតែវិបត្តិហិរញ្ញវត្ថុ។ ដូច្នេះ ឯកឧត្ដមក៏បានស្នើសុំឱ្យក្រសួងអប់រំ យុវជន និងកីឡា ឆាប់បើកសាលារៀនឡើងវិញ ហើយប្រសិនបើក្រសួងអប់រំមិនបើកសាលារៀនឡើងវិញទេ គឺគ្រឹះស្ថានអប់រំឯកជនត្រូវបង្ខំចិត្តកាត់ជម្រុះបុគ្គលិកចេញហើយ ព្រោះលែងមានប្រាក់ខែសម្រាប់បើកឱ្យទៀតហើយ៕ដោយ ប៊ុនរិទ្ធ សម្រួលផ្សាយដោយ៖ ធូ កុសល
ប្រភព៖ ក្រសួងព័ត៌មាន