ជនបរទេសរបួសមួយចំហៀងខ្លួន ដោយសារតែស្នាដៃលោកចោរ
បាត់ដំបង ៖ នៅថ្ងៃសៅរ៍ ០៦រោច ខែស្រាពណ៌ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០១ ខែកញ្ញា ឆ្នាំ២០១៨ វេលាម៉ោង ០៣៖១៥នាទី មានករណីឆក់កាបូបជនបរទេស ១លើក បង្ករដោយជនសង្ស័យ ២នាក់ នៅចំណុចភូមិសូភី១ សង្កាត់រតនៈ ក្រុងបាត់ដំបង ខេត្តបាត់ដំបង។
លោកវរសេនីយ៍ឯក ប៉ាង.ហៀង អធិការនគរបាលក្រុងបាត់ដំបង បានរាយការណ៍អោយដឹងថា មានករណីឆក់យកកាបូបជនបរទេស បង្ករដោយជនសង្ស័យចំនួន ០២នាក់ មធ្យោបាយម៉ូតូម៉ាកហុងដាឌ្រីម ២គ្រឿង មិនស្គាល់ស៊េរីឆ្នាំ ពណ៌ខ្មៅ បានធ្វើសកម្មភាពឆក់កាបូបជនរងគ្រោះបណ្តាលឲ្យដួលរងរបួស ហើយជនសង្ស័យក៏បានឆក់យកកាបូបស្ពាយពណ៌ប្រផេះរួចជិះម៉ូតូគេចខ្លួនបាត់។ ជនរងគ្រោះឈ្មោះ ឡា.ណាអាន់ ភេទស្រី អាយុ ៣៥ឆ្នាំ មកពីប្រទេសអូស្ត្រាលី។
លោកអធិការនគរបាលក្រុងបានបន្តថា សម្ភារៈរបស់ជនជាតិអូស្ត្រាលីជាជនរងគ្រោះដែលបាត់បង់រួមមាន កាបូបស្ពាយពណ៌ប្រផេះចំនួន ០២ ទូរស័ព្ទដៃ IPhone ៦Plus ពណ៌ខ្មៅ ១គ្រឿង លុយចំនួន ៧០ដុល្លា កាតATM ចំនួន ០១ ប័ណ្ណសម្គាល់ខ្លួនចំនួន ០១។ ករណីនេះ សមត្ថកិច្ចជំនាញកំពុងតែធ្វើការស្រាវជ្រាវរកចាប់ខ្លួនជនសង្ស័យ ដើម្បីយកមកផ្តន្ទាទោសតាមច្បាប់៕
ប្រភព៖ អគ្គស្នងការដ្ឋាននគរបាលជាតិ