ឯកសារចាំបាច់ ដែលអាណាព្យាបាលត្រូវភ្ជាប់ជាមួយពេលនាំកូន ក្មួយ ឬចៅ ទៅចាក់វ៉ាក់សាំងបង្ការកូវីដ

នាព្រឹកថ្ងៃទី០១ ខែសីហា ឆ្នាំ២០២១ ខាងមុខនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើចូលរួមជាអធិបតីដ៏ខ្ពង់ខ្ពស់ក្នុងឱកាសប្រកាសបើកយុទ្ធនាការចាក់វ៉ាក់សាំងកូវីដ១៩ ជូនកុមារ និងយុវវ័យមានអាយុចាប់ពី១២ឆ្នាំ ដល់អាយុក្រោម១៨ឆ្នាំ ដោយមានការចូលរួមផងដែរពីសម្តេច ឯកឧត្តម លោកជំទាវ ជាថ្នាក់ដឹកនាំរាជរដ្ឋាភិបាលនៅវិមានសន្តិភាព នៃទីស្តីការគណៈរដ្ឋមន្ត្រី។

យុទ្ធនាការចាក់វ៉ាក់សាំងកូវីដ១៩ ជូនកុមារ និងយុវវ័យមានអាយុចាប់ពី១២ឆ្នាំ ដល់អាយុក្រោម១៨ឆ្នាំ នឹងចាប់ផ្តើមបើកយុទ្ធនាការនៅថ្ងៃទី០១ ខែសីហា ឆ្នាំ២០២១ ចេញពីរាជធានីភ្នំពេញ និងបន្តបន្ទាប់នៅខេត្តកណ្តាល ខេត្តព្រះសីហនុ និងខេត្តកោះកុង ដែល គ.វ.ក-១៩ នឹងរៀបចំចាត់ចែងយុទ្ធនាការចាក់វ៉ាក់សាំងនេះ។

តាមរយៈកិច្ចសំភាសន៍រវាងលោ​កជំទាវវេជ្ជបណ្ឌិត​ ឱ វណ្ណឌីន​ រដ្ឋលេខាធិការ​ក្រសួង​សុខាភិបាល​ និងជាប្រធាន​គណៈកម្មការ​ចំពោះកិច្ច​ចាក់វ៉ាក់សាំង​ការពារជំងឺ​កូវីដ-១៩ ជាមួយទូរទស្សន៍ BTV បានឲ្យដឹងថា ចំពោះយុទ្ធនាការចាក់វ៉ាក់សាំងកូវីដ១៩ ជូនកុមារ និងយុវវ័យមានអាយុចាប់ពី១២ឆ្នាំ ដល់អាយុក្រោម១៨ឆ្នាំនេះ ឯកសារចាំបាច់ ដែលអាណាព្យាបាលត្រូវមានពេលនាំកូន ក្មួយ និងចៅ សម្រាប់យកទៅបង្ហាញពេលចាក់វ៉ាក់សាំងរួមមាន៖

+ ទី១ សំបុត្រកំណើត ដើម្បីកំណត់ឲ្យបានត្រឹមត្រូវនូវអាសយដ្ឋាន និងអាយុពិតប្រាកដរបស់កុមារ

+ ទី២ ប្រសិនបើមិនមានសំបុទ្រកំណើតទេ ក៏អាចមានជា passport ក៏បានដែរ

+ ទី៣ បើមិនមាន passport ទេ គឺអាចសៀវភៅគ្រួសារ ជាទូទៅក្រុមគ្រួសារនីមួយៗតែងតែមានសៀវភៅគ្រួសារ។ នេះគឺជាឯកសារគតិយុត្តិ ដែលតម្រូវឲ្យបងប្អូនដែលនាំកូន ក្មួយ ចៅ ទៅចាក់វ៉ាក់សាំង គឺកាន់យកទៅជាមួយ។