កាលពីថ្ងៃអាទិត្យ កន្លងទៅនេះ ក្រុមហ៊ុន Samsung បានសម្រេចដាក់បង្ហាញកំពូលស្មាតហ្វូន Galaxy S9 និង S9 Plus របស់ខ្លួនក្នុងព្រឹត្តិការណ៍ Mobile World Congress 2018។ ជាការពិតណាស់ ម៉ូដែលថ្មីត្រកូល S ទាំងពីរនេះ គឺមានរូបរាងដូចគ្នាទាំងស្រុងទៅនឹង Galaxy S8 និង S8+ ប៉ុន្ដែ ចំពោះមុខងារ និងលក្ខណៈពិសេសវិញគឺមិនដូចគ្នាឡើយ។ ខាងក្រោមនេះ គឺជាចំណុចពិសេសដ៏អស្ចារ្យទាំង 4ដែលកំពូលស្មាតហ្វូន Galaxy S9 និង S9 Plus បានភ្ជាប់មកជាមួយ ហើយបន្ទាប់ពីស្គាល់ពីចំណុចទាំងអស់នេះ ធានាថាអ្នកនឹងជាប់ចិត្តស្រលាញ់ដកចិត្តវិញមិនបានឡើយ។

1/ បន្ទះស្កេនស្នាមក្រយ៉ៅដៃ

សម្រាប់ការផ្លាស់ប្ដូរដ៏ធំមួយពី Galaxy S8 និង S8+ គឺបន្ទះស្កេនស្នាមក្រយ៉ៅដៃនេះឯង។ ក្រុមហ៊ុន Samsung បានសម្រេចធ្វើតាមការចង់បានរបស់អតិថិជនដោយផ្លាស់ប្ដូរបន្ទះស្កេននេះពីផ្នែកខាងស្ដាំក្បែរកាមេរ៉ា មកខាងក្រោមកាមេរ៉ាវិញ ដែលជាហេតុធ្វើឲ្យការស្កេនមានសភាពងាយស្រួលជាងមុន និងមិនខ្លាចប្រឡាក់ lens កាមេរ៉ាទៀតឡើយ។

2/ អេក្រង់កាន់តែភ្លឺជាងមុន និងរក្សារាងខ្ពស់ដដែល

Galaxy S9 គឺមានទំហំអេក្រង់ 5.8អ៊ីញ និង 6.2អ៊ីញសម្រាប់  Galaxy S9+។ អាចនិយាយបានថា ម៉ូដែលកំពូលទាំងពីរនេះ គឺជាស្មាតហ្វូនដែលមានរាង និងកម្ពស់ខ្ពស់ជាងគេលើទីផ្សារ ហើយអ្វីដែលកាន់តែអស្ចារ្យជាងនេះទៅទៀតនោះគឺ អេក្រង់របស់ស្មាតហ្វូនទាំងពីរនេះ អាចបញ្ចេញពន្លឺបានល្អ និងខ្លាំងមិនចាញ់ពន្លឺព្រះអាទិត្យឡើយ។ គួរបញ្ជាក់ផងដែរថា ចំពោះ iPhone 8 Plus វិញគឺមានទំហំអេក្រង់ត្រឹមតែ 5.5អ៊ីញប៉ុណ្ណោះ ស្របពេលជាមួយនឹង Galaxy Note 8 មានទំហំអេក្រង់រហូតដល់ទៅ 6.3អ៊ីញឯណោះ។

ក្រុមហ៊ុន Samsung នៅតែប្រើប្រាស់អេក្រង់ប្រភេទ Super AMOLED ដដែល ក្នុងកម្រឹតបង្ហាញរូបភាព 2960 x 1440 pixel (ដូចគ្នាទៅនឹង Note 8 ដែរ)។ ប៉ុន្ដែ អ្វីដែលគួរឲ្យចាប់អារម្មណ៍បំផុតនោះគឺ ស្មាតហ្វូនកំពូលទាំងពីរនេះមានកម្រឹតសមាមាត្រ 18.5:9 ដូចគ្នាសម្រាប់ឆ្នាំនេះ ហើយកម្រឹតនេះគឺខ្ពស់ជាងគេ និងភ្លឺជាងគេបំផុតហើយ។

3/ កាមេរ៉ាអាចផ្លាស់ប្ដូរកម្រឹត Aperture បាន

កំពូលស្មាតហ្វូន Galaxy S9 និង S9+ គឺជាស្មាតហ្វូនដំបូងលើពិភពលោក ដែលមានមុខងារផ្លាស់ប្ដូរកម្រឹត Aperture ក្នុងកាមេរ៉ាបាន។ ដោយឡែក ប្រសិនបើអ្នកប្រើកាមេរ៉ារបស់ម៉ូដែលណាមួយដើម្បីថតរូបក្នុងលក្ខខណ្ឌងងឹង នោះកម្រឹត Aperture របស់កាមេរ៉ានឹងរីកធំជាងមុនរហូតដល់ f/1.5។ ផ្ទុយទៅវិញ ប្រសិនបើអ្នកព្យាយាមថតរូបក្នុងលក្ខខណ្ឌពន្លឺគ្រប់គ្រាន់នោះកម្រឹត Aperture នឹងរួមតូចដល់ f/2.4 ដោយស្វ័យប្រវត្តិ។

ក្រៅពីលក្ខណៈពិសេសខាងលើនេះ ផ្ទៃបង្ហាញរូបភាពកម្មវិធីកាមេរ៉ាក៏ត្រូវបានរចនាថ្មីដែរ ដែលធ្វើឲ្យអ្នកមានភាពងាយស្រួលក្នុងការអូសផ្លាស់ប្ដូរមុខងារ។ លើសពីនេះទៅទៀត មុខងារ Autofocus ក៏ធ្វើការបានកាន់តែល្អ ឯការថត Slow-mo គឺយឺតខ្លាំង និងរលូនល្អគ្មានពីរតែម្ដង។ ជាការពិតណាស់ Galaxy S9 និង S9+ គឺមានលក្ខណៈពិសេសដូចគ្នាទាំងអស់ ខុសតែម៉ូដែល Plus មានកាមេរ៉ាក្រោយពីរគ្រាប់ប៉ុណ្ណោះ។

4/ មានរន្ធដោតកាស

រន្ធដោតកាស នៅតែជាចំណុចសំខាន់សម្រាប់អ្នកប្រើប្រាស់ និងជាតម្រូវការចាំបាច់ផងដែរ។ សម្រាប់កំពូលស្មាតហ្វូន Galaxy S9 និង S9+ គឺនៅរក្សារន្ធដោតកាស 3.5មមនេះដដែល ហើយមិនធ្វើឲ្យអតិថិជនខកបំណងឡើយ។ ផ្ទុយទៅវិញ សម្រាប់កំពូលស្មាតហ្វូនផ្សេងៗទៀតនាពេលបច្ចុប្បន្ន បានសម្រេចលុបបំបាត់រន្ធនេះចោល ហើយស្មាតហ្វូនទាំងនោះគឺមានដូចជា iPhone X, 8, and 8 Plus, Pixel 2 XL និងសូម្បីតែ Huawei Mate 10 Pro។

Fu

ប្រភព៖ theverge