យោងតាមការចុះផ្សាយរបស់សារព័ត៌មាន CNN បានរាយការណ៍ថា ក្រុមហ៊ុន Facebook បានផ្លាស់ប្តូរឈ្មោះសាជីវកម្មរបស់ខ្លួនទៅជា «Meta» ដែលជាផ្នែកមួយនៃការផ្លាស់ប្ដូរយីហោឡើងវិញដ៏សំខាន់។ ក្រុមហ៊ុនបាននិយាយថា ខ្លួននឹងធ្វើឱ្យកាន់តែប្រសើរឡើងជាមួយនឹងអ្វីដែលមានស្រាប់ ខណៈនឹងពង្រីកខ្លួនឱ្យលើសពីប្រព័ន្ធផ្សព្វផ្សាយសង្គម ទៅក្នុងវិស័យដូចជា Virtual reality (VR) ជាដើម។ ការផ្លាស់ប្តូរនេះមិនអនុវត្តចំពោះកម្មវិធី Facebook, Instagram និង Whatsapp នោះទេ ពោលគឺការផ្លាស់ប្ដូរសម្រាប់តែក្រុមហ៊ុនប៉ុណ្ណោះ។

ពាក្យ «Meta» គឺមកពីពាក្យក្រិកមានន័យថា «លើសពីនេះ» ហើយសម្រាប់​អ្នក​ផ្សេងទៀត Metaverse ​មើល​ទៅ​ដូច​ជា​កំណែ VR ប៉ុន្តែ​អ្នក​ខ្លះ​ជឿ​ថា ​វា​អាច​ជា​អនាគត​នៃ​អ៊ីនធឺណិត។ អ្នកប្រើប្រាស់ Metaverse អាចប្រើកាសស្ដាប់ ចូលទៅក្នុងពិភពនិម្មិត VR ដែលភ្ជាប់បរិស្ថានឌីជីថលបាន។ ក្រុមហ៊ុន Facebook បាននិយាយថា ខ្លួនមានបំណងចាប់ផ្តើមការជួញដូរភាគហ៊ុនរបស់ខ្លួន ក្រោមតម្លៃភាគហ៊ុនថ្មី MVRS ចាប់ពីថ្ងៃទី០១ ខែធ្នូ ឆ្នាំ២០២១ តទៅ។ ជាមួយគ្នានេះដែរ លោក Mark Zuckerberg ក៏បានប្រកាសដែរថា ការហៅតាម Messenger​ បែប VR គ្រោងនឹងដំណើរការលើទីផ្សារនិម្មិត ដែលអ្នកអភិវឌ្ឍន៍អាចលក់ទំនិញ និង Home screen ថ្មីនៅលើវែនតា Oculus Quest ដើម្បីធ្វើឱ្យការជជែក និងហ្គេមនៅក្នុងពិភពនិម្មិតកាន់តែរីករាយ៕

អត្ថបទ៖ លីដា
ប្រភព៖ CNN