ក្រសួងសុខាភិបាល ហាមឃាត់ការចែកចាយ លក់ផលិតផល WHITENING REPAIR FOOT CTEAM គ្មានការទទួលស្គាល់ពីក្រសួង

រាជធានីភ្នំពេញ៖ យោងតាមការចុះផ្សាយរបស់ ក្រសួងសុខាភិបាល នៅថ្ងៃទី០៧ ខែឧសភា ឆ្នាំ២០២២ បានចេញសេចក្ដីជូនព័ត៌មាន ស្ដីពីការហាមឃាត់ការចែកចាយ ឬលក់ផលិតផល WHITENING REPAIR FOOT CTEAM គ្មានការទទួលស្គាល់ពីក្រសួងសុខាភិ​បាល។

ក្រសួងសុខាភិបាល សូមជម្រាបជូនសាធារណជនទាំងអស់ឲ្យបានជ្រាបថា យោងតាមការពិនិត្យឃើញលើបណ្ដាញសង្គមហ្វេសប៊ុក មានគណនីឈ្មោះ Dr.Fitness II កំពុងផ្សព្វផ្សាយលក់ផលិតផលឈ្មោះ WHITENING REPAIR FOOT CTEAM គ្មានលេខប្រវេទន៍ ឬបញ្ជិកាពីក្រសួងសុខាភិបាល គិតត្រឹ​មថ្ងៃទី២៥ ខែមីនា ឆ្នាំ២០២២។

ដូច្នេះ សូមប្រជាពលរដ្ឋមុននឹងទិញឱសថ ឬផលិតផលគ្រឿងសម្អាងគ្រប់ប្រភេទ សូមពិនិត្យមើលតាបត្រប្រវេទន៍ដែលមានបិទលើសំបកវេចខ្ចប់ ហើយតាបត្រដែលត្រឹមត្រូវគឺមានពីរផ្នែក ១.ផ្នែកខាងលើមានឈ្មោះគ្រឹះស្ថានអាហរ័ណ នីហរ័ណ ២.ផ្នែកខាងក្រោមមានលេខប្រវេទន៍ ដូចមានគំរូភ្ជាប់ជាមួយ។

ក្រសួងសុខាភិបាល សូមជម្រាបជូនដំណឹងបងប្អូនប្រជាពលរដ្ឋទាំងអស់ឈប់ជឿការផ្សព្វផ្សាយផលិតផលគ្មានលេខប្រវេទន៍ ឬបញ្ជិកា ខាងលើជាបន្តទៀត និងឈប់ប្រើប្រាស់ផលិតផលនោះ ព្រោះផលិតផលនេះមិនអាចធានាបាននូវគុណភាព និងអាចធ្វើអោយប៉ះពាល់សុខភាពរបស់អ្នកប្រើប្រាស់ទៀតផង។

ម្ចាស់គណនីបណ្ដាញសង្គមហ្វេសប៊ុកខាងលើ និងជនពាក់ព័ន្ធដទៃទៀតត្រូវបញ្ឈប់ការនាំចូល ចែកចាយ ឬផ្សព្វផ្សាយផលិតផលគ្មានលេខប្រវេទន៍​ ឬបញ្ចិកាខាងលើជាបន្ទាន់។ ក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ចំពោះម្ចាស់គណនីខាងលើ និងជនពាក់ព័ន្ធទាំងឡាយដែលនាំចូល ចែកចាយ ឬផ្សព្វផ្សាយលក់ផលិតផលគ្មានលេខប្រវេទន៍ ឬបញ្ជិកាខាងលើ ទៅតាមច្បាប់ស្ដីពីវិសោធនកម្មច្បាប់ ស្ដីពីការគ្រប់គ្រងឱសថជាធរមាន ៕

ប្រភព៖ នាយកដ្ឋានឱសថ ចំណីអាហារ បរិក្ខារពេទ្យ និងគ្រឿងសំអាង