អគ្គនាយករងអគ្គិសនីកម្ពុជា ប្រើប្រាស់ពេលជិត៣ឆ្នាំ កែឆ្នៃតំបន់ «ភ្នំនាគស» ឱ្យក្លាយទៅជារមណីយដ្ឋានធម្មជាតិដ៏ទាក់ទាញ

ខេត្តពោធិ៍សាត់៖ យោងតាមការចុះផ្សាយរបស់​ រដ្ឋបាលខេត្តពោធិ៍សាត់ នៅថ្ងៃទី១៥ ខែសីហា ឆ្នាំ២០២២ បានឱ្យដឹងថា តំបន់បណ្តុំព្រៃភ្នំប្រវត្តិសាស្ត្រភ្នំគុហ៍ «ភ្នំនាគស ឬល្អាងព្រះនាងរំសាយសក់» ដែលស្ថិតក្នុងចំណុចកាច់កង់ ភូមិខ្សាច់ល្អិត ឃុំអន្សាចំបក់ ស្រុកក្រគរ ខេត្តពោធិ៍សាត់ ត្រូវបានក្រុមការងាររាជរដ្ឋាភិបាលចុះជួយឃុំ សហការជាមួយអាជ្ញាធរខេត្ត ស្រុក ឃុំ ធ្វើការសិក្សាជាច្រើនលើកច្រើនសារ ពោលគឺក្នុងអំឡុងឆ្នាំ២០១៩ រហូតឈានដល់ការឆាប់ផ្តើមសាងសង់ ដើម្បីកែប្រែតំបន់នេះ ឱ្យក្លាយជាតំបន់ទេសចរណ៍ដ៏ទាក់ទាញ ទៅថ្ងៃអនាគត។

ជាក់ស្តែងគិតមកត្រឹមថ្ងៃទី១៥ ខែសីហា ឆ្នាំ២០២២ ដែលមានរយៈពេលជិត៣ឆ្នាំមកនេះ តំបន់ព្រៃភ្នំប្រវត្តិសាស្ត្រ «ភ្នំនាគស» បានវិវត្តខ្លួនយ៉ាងឆាប់រហ័ស ដែលមានទេសភាពស្រស់ត្រកាលគួរគយគន់ អមដោយផ្ទាំងថ្មចម្លាក់តូចធំ ញ៉ាំងឱ្យទេសចរមកលេងម្តងហើយ នឹកចង់មកលេងម្តងទៀត។

ឯកឧត្តម អេង គន្ធា អគ្គនាយករងអគ្គិសនីកម្ពុជា បានឱ្យដឹងថា រមណីយដ្ឋាន «ភ្នំនាគស ឬល្អាងព្រះនាងរំសាយសក់» គឺជារមណីយដ្ឋានពិសេសមួយ ក្នុងចំណោមរមណីយដ្ឋានជាច្រើនទៀត ក្នុងខេត្តពោធិ៍សាត់ ដែលផ្តល់កន្លែងដើរលេងកម្សាន្ត លំហែអារម្មណ៍បែបធម្មជាតិ ដោយមិនគិតថ្លៃ និងដើម្បីឱ្យបងប្អូនពុកម៉ែប្រជាពលរដ្ឋ បានសិក្សាស្វែងយល់អំពីវប្បធម៌ ប្រវត្តិសាស្ត្រ ដែលមាននៅតំបន់នេះ។ ឯកឧត្តមបានបន្តថា រមណីយដ្ឋាននេះក៏ជារមណីយដ្ឋាន ធម្មជាតិ និងប្រវត្តិសាស្ត្រមួយ ដែលបានផ្ដួចផ្ដើមកសាងឡើងដោយរូបឯកឧត្តមផ្ទាល់ ក្រោមការជួយជ្រោមជ្រែងពីឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកក្រគរ និងស្រុកកណ្ដៀង និងឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ ពិសេសមានការគាំទ្រយ៉ាងពេញទំហ៊ឹង ពីសំណាក់អាជ្ញាធរគ្រប់លំដាប់ថ្នាក់ ដោយហេតុថា បានជួយការពារព្រៃឈើ ធម្មជាតិ និងសត្វព្រៃឱ្យនៅគង់វង្ស ទប់ស្កាត់ការកាប់ទន្ទ្រានដីព្រៃខុសច្បាប់ ពីសំណាក់ជនខិលខូច។

ស្ថាបនិករមណីយដ្ឋានភ្នំនាគស ឯកឧត្តម អេង គន្ធា បានបន្ថែមថា ក្នុងរយៈពេលជិត០៣ឆ្នាំមកនេះ ឯកឧត្តមបានចំណាយថវិកាកសាងជាង២លានដុល្លារ ដែលជាថវិកាផ្ទាល់ខ្លួនរបស់ឯកឧត្តម និងជាការចូលរួមពីថ្នាក់ដឹកនាំ និងសប្បុរសគ្រប់មជ្ឈដ្ឋាន ទៅលើសមិទ្ធផលរួមមាន៖ ចម្លាក់ព្រះពុទ្ធរូប រូបព្រះអង្គតូច ព្រះអង្គធំ រូបអ្នកមានបារមី ចាស់ព្រឹទ្ធាចារ្យ ទីលានយន្ដហោះ សួនផ្កាចម្រុះពណ៌ ផ្លូវបេតុង ផ្លូវកៅស៊ូ កន្លែងអង្គុយលេងកំសាន្ត កន្លែងបាញ់ទឹក រូបសំណាកសត្វចម្រុះលើផ្ទាំងថ្មតូចធំ ដែលមានម្លប់ដើមឈើត្រឈឹងត្រឈៃ លំអរដោយភ្លើងអគ្គិសនី ភ្លើងសូឡាព្រោងព្រាត ប្រៀបបានទៅនឹងទីក្រុងតូចមួយ ផុសនៅចំកណ្ដាលទ្រូងព្រៃ។

ឯកឧត្តមបានបន្ថែមទៀតថា ថ្មីៗនេះប៉មទស្សនា ៣៦០ដឺក្រេ កម្ពស់៥ជាន់ ត្រូវបានស្ថាបនាជិតរួចរាល់ ដែលអាចទាក់ទាញទេសចរ ចូលមកមើលទេសភាពព្រៃ ភ្នំ បឹងទន្លេសាប និងតំបន់ទីប្រជុំជន ដែលជាការរួមចំណែកយ៉ាងសំខាន់ដល់ការអភិវឌ្ឍវិស័យទេសចរណ៍ផងដែរ។

ឯកឧត្តម អេង គន្ធា មានប្រសាសន៍ថា អ្វីៗដែលកើតមានសព្វថ្ងៃនេះ គឺដោយសារប្រទេសជាតិមានសុខសន្តិភាព ក្រោមការដឹកនាំប្រកបដោយគតិបណ្ឌិត របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដូច្នេះយើងត្រូវរួមគ្នាថែរក្សាសន្ដិភាពឱ្យនៅគង់វង្សជារៀងរហូត។ ឯកឧត្តមនឹងខិតខំកសាងរមណីយដ្ឋានភ្នំនាគសនេះ ឱ្យកាន់តែល្អប្រសើរឡើងថែមទៀតពីមួយថ្ងៃទៅមួយថ្ងៃ ដើម្បីបានជាកន្លែងលេងកំសាន្តដ៏ពេញនិយមមួយ សម្រាប់ភ្ញៀវទេសចរណ៍ មកពីទីជិតឆ្ងាយ ពិសេសនៅក្នុងឱកាសបុណ្យកាន់បិណ្ឌភ្ជុំបិណ្ឌ នាពេលខាងមុខ៕

ប្រភព៖ Pursat Provincial Hall