(ភ្នំពេញ)៖ ទោះបីជា កម្មវិធី Cambodian Idol រដូវកាលទី៤ បានបញ្ចប់និងរកឃើញអ្នកលើកពានហើយក្តី ប៉ុន្តែបេក្ខជន៤រូបដែលបានឈានដល់វគ្គផ្តាច់ព្រ័ត្រ មាន តិច ម៉េង, ដាវីន, ភិទិ និងពន្លឺ តែងតែត្រូវបានមហាជនតាមដានមិនចេះដាច់។ តួយ៉ាងអ្នកស្រី ចន ច័ន្ទលក្ខិណា ប្រធានសមាគមសិល្បករខ្មែរ និងជាតារាសម្តែងមួយរូប ក្រោយពីបានជួបបេក្ខភាព Cambodian Idol ស៊ឹម ច័ន្ទពន្លឺ ក៏ពោលពាក្យកោតសរសើរថា «ក្មួយប្រុសពន្លឺជា Idol អ្នកណាខ្លះ ? តែមីងបោះឆ្នោតអោយទាំង ៤នាក់ ពេញចិត្តទាំងអស់ តែអាណិតក្មួយពេទ្យ មីងសុំសរសើរ ក្មួយចិត្តធ្ងន់ណាស់»។

សូមរំលឹកថាចាប់តាំងពីឡើងមកប្រកួត Cambodian Idol ស៊ឹម ច័ន្ទពន្លឺ រងការរិះគន់យ៉ាងខ្លាំងចាប់តាំងពីពេលចូលប្រកួត ដោយមានប្រើពាក្យសមរម្យ រហូតមានការលើកឡើងថា បេក្ខជនរូបនេះប្រើខ្សែដើម្បីបានឡើងដល់វគ្គផ្តាច់ព្រ័ត្រថែមទៀតផង។ ប៉ុន្តែ ស៊ឹម ច័ន្ទពន្លឺ មិនដែលធ្វើការឆ្លើយតបទៅនឹងពាក្យរិះគន់ទាំងនោះឡើយ ធ្វើឱ្យទស្សនិកជនលើកឡើងពីចរិកថ្លៃថ្នូរ មានសីលធម៌ មានសុជីវធម៌ ចិត្តធ្ងន់រឹងមាំ និងគ្រប់គ្រង់អារម្មណ៍បានល្អ របស់បេក្ខជនរូបនេះ៕