យោងតាមការបញ្ជាក់ពីលោក ឃ្លាំង ហួត អភិបាលរងរាជធានីភ្នំពេញ ដែលដឹកនាំប្រតិបត្តិការនេះ បានឲ្យដឹងថា យុទ្ធនាការបោសសម្អាតឃ្លាំងបញ្ចាំខុសច្បាប់ (ឃ្លាំងរំសេវ) ស្ថិតក្នុងសង្កាត់ទឹកល្អក់ទី៣ ខណ្ឌទួលគោក រយៈពេល៥ថ្ងៃ ចាប់ពីថ្ងៃទី១៩ ដល់ថ្ងៃទី២៣ ខែកញ្ញា ឆ្នាំ២០២២ បានចុះបង្ក្រាបចំនួន ១៣ទីតាំង និងបានដកហូតម៉ូតូ សរុបចំនួន ១,១១៣ គ្រឿង។ ហើយនៅក្នុងយុទ្ធនាការនោះផងដែរ សមត្ថកិច្ចបានធ្វើការឃាត់ខ្លួនមនុស្ស៩នាក់ ដែលពាក់ព័ន្ធករណីបង្ក្រាបកន្លែងបញ្ចាំខុសច្បាប់។

លោក ឃ្លាំង ហួត ក៏បានបញ្ចាក់នៅលើគណនីហ្វេសប៊ុកឲ្យដឹងផងដែរថា៖

«👉 សូមបញ្ជាក់ករណីឃាត់ខ្លួនមនុស្ស៩នាក់ដែលពាក់ព័ន្ធករណីបង្រ្កាបកន្លែងកុងសុីបញ្ចាំល្មើសច្បាប់​ ៖
👉 ករណីទី១ ឃាត់ខ្លួនថៅកែ១នាក់ និងកម្មករជួយទុកដាក់មើលថែរបស់ចោរកម្មចំនួន៤នាក់ សរុប៥នាក់ ។
👉 ករណីទី២ ឃាត់ខ្លួនថៅកែ១នាក់ និងកម្មករជួយទុកដាក់មើលថែរបស់ចោរកម្មចំនួន៣នាក់ សរុប៤នាក់ ។
🙏🙏🙏 សូមមេត្តាទុកជូនតុលាការធ្វើការតាមច្បាប់ ។
👉 ថៅកែនិងកម្មករគឺផ្សំគំនិតគ្នាប្រព្រឹត្តបទល្មើស»៕