ថ្មីៗនេះក្រុមហ៊ុនផលិតស្មាតហ្វូនរបស់ប្រទេសចិន Xiaomi បានបែកធ្លាយនូវវីដេអូ ថេប្លេត (​Tablet) ដែលមានសមត្ថភាពអាចផ្លាស់ប្តូរទៅជាស្មាតហ្វូនមួយទៀត។ វីដេអូនៃឧបករណ៍នេះត្រូវបានចែករំលែកដោយអ្នកលេងបណ្តាញសង្គម Twitter ជាពិសេសរឿងបែកធ្លាយបច្ចេកវិទ្យាថ្មីដ៏ល្បីល្បាញម្នាក់លោក Evan Blass ដែលបង្ហាញពីមនុស្សម្នាក់កំពុងចុចចូលក្នុងកម្មវិធីផែនទីមួយលើ Tablet របស់គាត់ បន្ទាប់មកក៏បត់វាចេញជាទូរស័ព្ទ។

លោក Evan Blass គាត់បាននិយាយថា មិនដឹងថាវីដេអូ ឬឧបករណ៍នេះនឹងអាចមានពិតនោះទេ ប៉ុន្តែគាត់ត្រូវបានគេប្រាប់ថា ឧបករណ៍បានធ្វើឡើងដោយក្រុមហ៊ុន Xiaomi។ យ៉ាងណាមិញក្រុមហ៊ុន Xiaomi មិនទាន់បានឆ្លើយតបនឹងសំណើសុំធ្វើអត្ថាធិប្បាយលើវីដេអូលេចធ្លាយនេះទេ។ ហើយបើវាជារឿងពិត ក្រុមហ៊ុន Xiaomi គឺកំពុងតែស្ថិតក្នុងចំណោមក្រុមហ៊ុនផ្សេងទៀតដែលកំពុងធ្វើការលើឧបករណ៍ដែលអាចបត់បាន រួមទាំងក្រុមហ៊ុនអេឡិចត្រូនិចយក្ស Samsung ផងដែរ៕

អត្ថបទ៖ លីដា
ប្រភព៖ independent