កាលពីពេលថ្មីៗនេះ លោកឧកញ៉ា ស្រី ចាន់ថន បានប្រកាសថា គាត់បានចុះហត្ថលេខាទ្វេភាគីជាមួយកីឡាករប្រដាល់ Thiago Teixeira ឱ្យមកចូលក្នុងក្លឹបគុនខ្មែរជើងឯកពិភពលោក។ លោកឧកញ៉ាបានគូសបញ្ជាក់ថា ការពិតទៅគាត់បានចុះហត្ថលេខាជាមួយអ្នកប្រដាល់ប្រេស៊ីលរូបនេះ តាំងតែពីគាត់ចុះពីលើយន្ដហោះពីប្រទេសអាល្លឺម៉ង់មកម៉្លេះ ប៉ុន្តែដោយសារមានស្ថាប័នមួយ និងគីគ្នារបស់ពួកគេ បានវាយប្រហារមកលើ Thiago Teixeira ខ្លាំងពេក ទើបគាត់ក៏មិនបានប្រកាសអ្វីឡើយ។ លោកឧកញ៉ារង់ចាំឱ្យ Thiago Teixeira មានទឹកចិត្តសប្បាយរីករាយ និងមានក្តីសង្ឃឹមឡើងវិញ ទើបគាត់សម្រេចប្រកាសវាជាផ្លូវការ។

ឧកញ៉ា ស្រី ចាន់ថន បានសរសេរនៅលើហ្វេសប៊ុករបស់គាត់ថា៖«ដូចបងប្អូនបានដឹងហើយថាកីឡាករ Thiago បានជួបបញ្ហាដែលមិនបានរំពឹងទុកនោះទេ ប៉ុន្មានថ្ងៃចុងក្រោយនេះគាត់បានជួបទុក្ខជាទម្ងន់។ ស្របពេលជាមួយគ្នាខ្ញុំសូមប្រកាសផ្លូវការថា ខ្ញុំបានយកកីឡាករ Thiago មកចូលក្នុងក្លឹបគុនខ្មែរជើងឯកពិភពលោករបស់យើងរួចរាល់ហើយកាលពីថ្ងៃទី ០៤ ខែ មេសា ឆ្នាំ ២០២៣ កន្លងទៅនេះ។ គូសបញ្ជាក់ផងដែរខ្ញុំបានចុះហត្ថលេខាយកកីឡាករ Thiago ចូលក្លឹបគុនខ្មែរជើងឯកពិភពលោកតាំងពីពេលដែលគាត់ចុះពីលើយន្តហោះមកទឹកដីកម្ពុជាភ្លាមៗមកម្លេះ។ ពេលនោះគាត់កំពុងតែមានសម្ពាធខ្លាំងពីស្ថាប័នរៀបចំកីឡាប្រដាល់មួយនៅប្រទេសអាឡឺម៉ង់។ ហេតុដូច្នេះខ្ញុំចង់ឲ្យកីឡាករ Thiago មានទឹកចិត្តសប្បាយរីករាយ និងមានក្តីសង្ឃឹមឡើងវិញទើបខ្ញុំសម្រចចិត្តចុះហត្ថលេខាយកគាត់ចូលក្លឹបរបស់ខ្ញុំដោយមិនរុញរាឡើយ។

ស្របពេលជាមួយគ្នាក្រោយពេលគាត់ទទួលបានកម្លាំងចិត្តនិងការគាំទ្រពីសម្តេចពុក និងបងប្អូនទូរទាំងប្រទេសមកដល់ម៉ោងនេះគាត់ពិតជាមានក្តីរំភើបរីករាយសប្បាយចិត្តឥតឧបមាឡើយ។ ហើយមូលហេតុដែលខ្ញុំមិនទាន់បង្ហោះសារមួយនេះក៏ដោយសារតែខ្ញុំរងចាំការដោះស្រាយបញ្ហាខ្លះៗជាមុនសិន ហើយមកដល់ម៉ោងនេះខ្ញុំបានចាត់ចែងការងាររបស់គាត់ជាមួយភ្នាក់ងារមួយអន្លើរហើយ។

ខ្ញុំយល់អំពីបញ្ហាដែលកីឡាករ Thiago កំពុងតែជួប ប៉ុន្តែខ្ញុំមិនខ្លាច មិនរុញរាក្នុងការនាំកីឡាករ Thiago ចូលក្លឹបរបស់ខ្ញុំនោះទេ បើទោះបីជាគាត់កំពុងតែមានបញ្ហាធំប៉ុនមេឃក៏ដោយ។ មូលហេតុដែលខ្ញុំហ៊ានចុះកិច្ចសន្យាយកកីឡាករ Thiago ក៏ដោយសារតែ គាត់បានលះបង់ទាំងផលប្រយោជន៍ ទាំងពេលវេលាផ្ទាល់ខ្លួន និងទាំងសុខសុវត្ថិភាពអាយុជីវិតរបស់គាត់ដើម្បីគុនខ្មែរ និងប្រជាជនខ្មែរទាំងក្នុងនិងក្រៅប្រទេសផងដែរ។ ដូច្នេះខ្ញុំមិនអាចក្បត់ឧត្តមគតិរបស់ខ្ញុំបានឡើយ ពោលគឺខ្ញុំត្រូវតែចុះហត្ថលេខាយកគាត់ចូលក្លឹបរបស់ខ្ញុំជាដាច់ខាត។ ក្នុងពេលនេះ Thiago ត្រូវការកម្លាំងចិត្តពីបងប្អូនជាងពេលណាៗទាំងអស់ ដូច្នេះខ្ញុំសូមសំណូមពរឲ្យបងប្អូនមេត្តាគាំទ្រគាត់ ស្រលាញ់គាត់ឲ្យកាន់តែខ្លាំងក្លាបន្ថែមទៀត។ ដោយក្តីគោរព និងស្រលាញ់បំផុតពីខ្ញុំបាទ ស្រី ចាន់ថន ❤️🇰🇭🇧🇷❤️#kunkhmerworldchampion
#Ilovecambodia #IloveKunKhmer #Sreychanthorn #JetGroup #Cambodia #KunKhmer #Cambodiamartialarts »៕

ប្រភព៖ ឧកញ៉ា ស្រី ចាន់ថន
អត្ថបទ៖ លីដា