កីឡាការិនីកូនកាត់ ៣សាសន៍ ខាន់ ចេសា បង្ហាញពីមោទកភាពដែលបានតំណាងឱ្យប្រទេសកម្ពុជា ក្នុងការប្រកួតស៊ីហ្គេម

រាជធានីភ្នំពេញ៖ យោងតាមគណនីហ្វេសប៊ុកផ្ទាល់របស់ ឯកឧត្តម ហ៊ុន ម៉ានី បានបង្ហោះពីវីដេអូប្រមាណជា ១៖៤៧វិនាទី របស់កីឡាការិនីកូនកាត់ ៣សាសន៍ ខាន់ ចេសា បង្ហាញពីមោទកភាពដែលបានតំណាងឱ្យប្រទេសកម្ពុជា ក្នុងការប្រកួតស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។

ឯកឧត្តម ហ៊ុន ម៉ានី បានបង្ហោះវិដេអូ ភ្ជាប់ជាមួយខ្លឹមសាររបស់កីឡាការិនី ខាន់ ចេសា​ យ៉ាងដូច្នេះថា៖ «កម្ពុជា ខ្ញុំនៅទីនេះជាមួយអ្នក។ ខ្ញុំសង្ឃឹមថា ខ្ញុំនឹងធ្វើឲ្យអ្នកមានមោទកភាពចំពោះខ្ញុំ ដូចខ្ញុំមានមោទកភាពចំពោះអ្នក។ ខ្ញុំសឹងតែមិនជឿថា ពេលនេះខ្ញុំអាចកាន់ទង់ជាតិចេញទៅប្រកួត វាគឺជាក្តីស្រមៃក្លាយជាការពិត។ ទោះខ្ញុំនៅទីណាក៏ដោយ ខ្ញុំនៅតែជាខ្មែរ ហើយខ្ញុំដឹងថា នៅពេលដែលខ្ញុំប្រកួតប្រជាជាតិទាំងមូល នឹងនៅជាមួយខ្ញុំជានិច្ច។»

នេះជាភាសាពោរពេញដោយមោទកភាពក្នុងភាពជាខ្មែររបស់កីឡាការិនី ជឺជីតស៊ូ ខាន់ ចេសា ដែលជាកីឡាការិនីកូនកាត់ម្នាក់ដែលបានខិតខំប្រឹងប្រែងនាំយកកិត្តិយសជូនជាតិជារឿយៗ។

នៅក្នុងគណនីហ្វេសប៊ុកផេករបស់ Beyond the Games​ បានសរសេររៀបរាប់ថា៖ ខាន់ ចេសា គឺជាកីឡាការិនីកូនកាត់ ផ្នែកកីឡាជឺជីតស៊ូដែលមានឪពុកជាជនជាតិខ្មែរ និងម្ដាយជាជនជាតិម៉ិកសិចកូកាត់អាមេរិក។ កីឡាការិនីដ៏វ័យក្មេងម្នាក់នេះបានចូលរួមការប្រកួតទាំងថ្នាក់ជាតិ និងអន្តរជាតិ ថែមទាំងដណ្តើមយកបានមេដាយមាសឲ្យប្រទេសកម្ពុជានៅឆ្នាំ ២០១៨ ក្នុងព្រឹត្តិការណ៍អាស៊ានហ្គេមក្នុងវិញ្ញាសាជឺជីតស៊ូនេវ៉ាហ្សា (Newaza) ក្នុងវិញ្ញាសារប្រភេទទម្ងន់៤៩ គីឡូ នៅប្រទេសឥណ្ឌូនេស៊ី។

មេដាយមាសនេះបាននាំមកនូវមោទកភាព និងកិត្តិយសជូនជាតិយ៉ាងក្រៃលែង ដែលជាមេដាយមាសដំបូងគេដែលកម្ពុជាទទួលបានសម្រាប់ប្រភេទកីឡាជឺជីតស៊ូ។ បន្ថែមពីនេះ ចេសាក៏បានដណ្តើមយកមេដាយមាសមួយទៀតជូនជាតិមាតុភូមិនៅក្នុងព្រឹត្តិការណ៍ស៊ីហ្គេមលើកទី៣០ នៅប្រទេសហ្វីលីពីនក្នុងឆ្នាំ ២០១៩ សម្រាប់ប្រភេទកីឡាដដែលនេះ។

សូមទស្សនាវីដេអូចំណាប់អារម្មណ៍របស់កីឡាការិនី ខាន់ ចេសា នៅពេលដែលនាងអាចតំណាងឱ្យប្រទេសកម្ពុជា៖

ប្រភព៖ Beyond the Games