អ្នកប្រដាល់មីយ៉ាន់ម៉ា Dave Leduc បានផ្ញើសារអបអរ ព្រំ សំណាង ក្រោយឈ្នះមេដាយមាសស៊ីហ្គេម ខណៈរំពឹងនឹងបានជួបគ្នាឆាប់ៗ

កាលពីថ្ងៃព្រហស្បតិ៍ ទី១១ ខែឧសភា ឆ្នាំ២០២៣ ម្សិលមិញនេះ កីឡាករគុនខ្មែរ រុំ សំណាង (ឬ ព្រំ សំណាង) បានឈ្នះមេដាយមាសជូនជាតិ បន្ទាប់ពីយកឈ្នះកីឡាករមីយ៉ាន់ម៉ា TUN TUN MIN ដោយពិន្ទុ ក្នុងវិញ្ញាសាប្រដាល់គុនខ្មែរ ប្រភេទទម្ងន់ ៨១ គីឡូក្រាម ក្នុងជំនួបវគ្គផ្ដាច់ព្រ័ត្រនៅពហុកីឡដ្ឋានជាតិមរតកតេជោ។ បន្ទាប់ពីការឈ្នះនេះផងដែរ អ្នកប្រដាល់មីយ៉ាន់ម៉ា Dave Leduc ក៏បានផ្ញើសារអបអរ និងរំពឹងថា នឹងបានជួប រុំ សំណាង ឆាប់ៗនេះ។

កីឡាករប្រដាល់ Dave Leduc បានសរសេរនៅលើបណ្ដាញសង្គមគាត់ថា៖« អបអរសាទរដល់ ព្រំ សំណាង ដែលឈ្នះមេដាយមាសនៅស៊ីហ្គេម។ ចំណុចខ្លាំងរបស់ ទុន ទុនមីន គឺស្នៀតកណ្តាប់ដៃ និងបុកក្បាល។ ក្នុងការប្រកួតដែលមិនពាក់ហ្គង់ ស្នៀតកណ្តាប់ដៃ និងបុកក្បាលរបស់គេ ពិតជាគ្រោះថ្នាក់ខ្លាំងណាស់ ព្រោះខ្ញុំវាយគ្នាជាមួយគាត់ ៣ ដងហើយ។ ទោះជាយ៉ាងណា ក៏ដោយ ដោយប្រើហ្គង់ និងប្រដាប់ពាក់ការពារក្បាល គាត់មិនអាចវាយឱ្យឈឺខ្លាំងបានទេ … ប៉ុន្តែខ្ញុំអាចធ្វើបាន😉

មីយ៉ាន់ម៉ា និងកម្ពុជា តែងតែមានទំនាក់ទំនងល្អជាមួយគ្នា។ ខ្ញុំរីករាយបន្តការគោរព និងមិត្តភាពរវាងប្រទេសទាំងពីរ នៅពេលដែលយើងជួបគ្នានៅលើសង្វៀន។ សូមអបអរសាទរម្តងទៀត អ្នកគឺជាអ្នកប្រយុទ្ធដ៏ជំនាញមួយរូប។ 🥇👏👏
អបអរសាទរដល់កម្ពុជា!!
ខ្ញុំគិតថាឆាប់ៗនេះ ខ្ញុំនឹងជួបអ្នក។
– ដាវ»៕

អត្ថបទ៖ លីដា
ប្រភព៖ ហ្វេសប៊ុក Dave Leduc