អាជ្ញាធរ​នៅក្នុង​ប្រទេស​ចិន​បាន​ដាក់​ពិន័យ​ជា​ប្រាក់​យ៉ាងសន្ធឹកសន្ធាប់ ​លើ​ប្រតិបត្តិករ​ទូទាត់​ប្រាក់​តាម​ទូរស័ព្ទ​ Ant Group របស់ស្ថាបនិកលោក Jack Ma។ សកម្មភាពនេះត្រូវបានគេមើលឃើញថា ជាផ្នែកមួយនៃការបង្រ្កាបអស់រយៈពេលជាច្រើនឆ្នាំ លើឧស្សាហកម្មបច្ចេកវិទ្យា។ ក្រុមហ៊ុន​នេះ​ត្រូវ​បាន​ចោទ​ប្រកាន់​ថា ​បាន​បំពាន​ច្បាប់​ទាក់ទង​នឹង​ការ​ការពារ​អតិថិជន ធនាគារ និង​ការ​ធានា​រ៉ាប់រង។ កាលពីថ្ងៃសុក្រ រដ្ឋបាលជាតិនៃបទប្បញ្ញត្តិហិរញ្ញវត្ថុ និងអង្គភាពផ្សេងទៀតបាននិយាយថា ការផាកពិន័យសរុបមានចំនួន ៧.១ ពាន់លានយ័ន ឬប្រហែល ៩៨០ លានដុល្លារអាមេរិក។

Ant Group គឺជាសាខារបស់ក្រុមហ៊ុន e-commerce យក្ស Alibaba ដែលស្ថាបនិកលោក Jack Ma បានរិះគន់យ៉ាងចំហរចំពោះនិយតករហិរញ្ញវត្ថុរបស់ប្រទេសចិន កាលពីក្នុងខែតុលា ឆ្នាំ២០២០។ មិនយូរប៉ុន្មាន Ant Group ត្រូវបានបង្ខំឱ្យលុបចោលការចុះបញ្ជីទីផ្សារ ដែលក្រុមហ៊ុននេះបានព្យាយាមប៉ុនប៉ង។ ហើយក្នុងរយៈពេលប៉ុន្មានឆ្នាំមកនេះ ទីក្រុងប៉េកាំងបាននឹងកំពុងរឹតបន្តឹងបទប្បញ្ញត្តិលើក្រុមហ៊ុនបច្ចេកវិទ្យាធំៗជាច្រើន មិនថាតែ Ant Group នោះទេ។

ជាក់ស្ដែង សេចក្តីប្រកាសកាលពីថ្ងៃសុក្រក៏បាននិយាយផងដែរថា ក្រុមហ៊ុនសេវាកម្មទូទាត់ដែលប្រតិបត្តិការក្រោមក្រុមហ៊ុន Tencent Group ត្រូវបានពិន័យជាប្រាក់ចំនួន ៤១៤ លានដុល្លារ។ ការបំពានដែលត្រូវបានចោទប្រកាន់រួមមាន ការគ្រប់គ្រងអ្នកប្រើប្រាស់ដោយខុសច្បាប់។ អាជ្ញាធរនិយាយថា បញ្ហាភាគច្រើននៃការអនុវត្តហិរញ្ញវត្ថុរបស់ក្រុមហ៊ុនបែបនេះឥឡូវនេះត្រូវបានកែតម្រូវ៕

អត្ថបទ៖ លីដា
ប្រភព៖ NHK