រាជធានីភ្នំពេញ៖ យោងតាមការចុះផ្សាយរបស់ មជ្ឈមណ្ឌលព្យាបាលកុមារ បេះដូងជប៉ុន កាលពីថ្ងៃទី១៣ ខែកក្កដា ឆ្នាំ២០២៣ម្សិលមិញនេះ បានឱ្យដឹងថា កុមារាជនជាតិមីយ៉ាន់ម៉ាម្នាក់ ឈ្មោះ អ៊ុង ខាន់ មឿ បានទទួលការវះកាត់ហើយទៅលើជំងឺដ៏កម្រមួយគឺ សេរីរាង្គនៅក្រៅពោះ កាលពីថ្ងៃអាទិត្យមុន នៅកម្ពុជា។

កុមារាអាយុ២ឆ្នាំរូបនេះ បានទទួលការវះកាត់ ដោយត្រូវបានចំណាយអស់រយៈពេល៥ម៉ោង ក្រោមកិច្ចសហការរវាងក្រុមវេជ្ជបណ្ឌិតឯកទេសកម្ពុជា និងជប៉ុន ខណៈដែលស្តី្រជាម្តាយ បាននិយាយថា ៖ “ខ្ញុំសូមអរគុណណាស់ដែលបានខ្វល់ខ្វាយអំពីប្រជាជនមីយ៉ាន់ម៉ា វាមានន័យខ្លាំងណាស់សម្រាប់ពួកយើង!”។

សូមបញ្ជាក់ថា កុមារាដ៏តូចម្នាក់នេះបានឆ្លងកាត់ការវះកាត់អស់ជាច្រើនម៉ោង រាងកាយរបស់គេមានសភាពខ្សោះខ្សោយ និងកំពុងសម្រាកនៅក្នុងបន្ទប់ថែទាំក្រោយវះកាត់នៅបន្ទប់សង្គ្រោះបន្ទាន់ (ICU) ហើយគេបានធូរស្បើយបន្ថិចម្តងៗពីមួយថ្ងៃទៅមួយថ្ងៃ។ គេកំពុងទទួលបានការថែទាំយ៉ាងល្អពីក្រុមគ្រូពេទ្យ និងម្តាយរបស់គេទាំងយប់ទាំងថ្ងៃ។

ម្តាយរបស់ ខាន់ មឿ បាននិយាយថា ៖ “ខ្ញុំសូមអរគុណអ្នកទាំងអស់គ្នាខ្លាំងណាស់!ដែលបានជួយកូនប្រុសខ្ញុំ ពួកយើងបារម្ភណាស់ក្នុងការធ្វើដំណើរមកឆ្ងាយពីផ្ទះ។ នៅពេលដែលពួកយើងបានមកដល់ប្រទេសកម្ពុជា មិនថាតែបុគ្គលិកសុខាភិបាលទេ គ្រប់គ្នាដែលបម្រើការតាមផ្នែកនីមួយៗបានមើលថែ និងយកអាសារពួកយើងណាស់! ទោះបីជាពួកយើងមិនចេះនិយាយភាសាខ្មែរក៏ដោយ តែពួកយើងទទួលបានអារម្មណ៍កក់ក្តៅពីប្រជាជនកម្ពុជាពិតមែន! ស្ថិតក្នុងស្ថានភាពបច្ចុប្បន្ន នៅប្រទេសមីយ៉ាន់ម៉ា មានកុមារជាច្រើនដែលមានជំងឺ និងកំពុងរងទុក្ខដូចកូនប្រុសខ្ញុំអញ្ចឹងដែរ”៕

ប្រភព៖ ក្រសួងព័ត៌មាន