ថ្វីបើកងកម្លាំង​រុស្ស៊ី និង​អ៊ុយក្រែន ​បាន​ធ្វើ​សង្រ្គាម​ដែល​ភាគច្រើន​ផ្តោត​លើ​ដីគោកក៏ដោយ ប៉ុន្តែតំបន់សមុទ្រខ្មៅឥឡូវនេះ ក៏បានក្លាយជាចំណុចក្ដៅផងដែរ។ ជាក់ស្ដែងភាគី​ទាំង​ ២ កំពុង​បង្កើន​វោហាសាស្ត្រ​ និង​គំរាម​ពង្រីក​វិសាលភាព​នៃ​ការ​វាយ​ប្រហារ​របស់​ខ្លួនជាបន្ដបន្ទាប់។ ជាក់ស្ដែងកាលពីថ្ងៃច័ន្ទ ប្រទេសរុស្ស៊ីបានដកខ្លួនចេញពីកិច្ចព្រមព្រៀងមួយ ដែលអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិរបស់ពួកគេទៅកាន់ពិភពលោក ហើយកាលពីថ្ងៃពុធ ខ្លួនក៏បានព្រមានថា កប៉ាល់ណាដែលធ្វើដំណើរទៅកាន់អ៊ុយក្រែន នឹងត្រូវបានចាត់ទុកថា ជាគោលដៅយោធាដ៏មានសក្តានុពល។

អ៊ុយក្រែនបានឆ្លើយតបទៅវិញភ្លាមៗ​ ដោយមន្ត្រីការពារជាតិរបស់ពួកគេបាននិយាយថា កប៉ាល់ទាំងអស់ដែលធ្វើដំណើរចេញពីកំពង់ផែដែលគ្រប់គ្រងដោយរុស្ស៊ី ក៏អាចនឹងរងការវាយប្រហារ។ ពួកគេ​បាន​ព្រមាន​ថា នាវា​ទាំងនោះ​អាច​នឹង​ជួប​ជោគវាសនា​ដូចគ្នា​នឹង​នាវាចម្បាំង​របស់​កងទ័ពជើងទឹក​រុស្ស៊ី Moskva ដែលត្រូវបានលិចនៅក្នុងខែមេសា ឆ្នាំ២០២២ ភ្លាមៗបន្ទាប់ពីការចាប់ផ្តើមនៃសង្រ្គាមនៃប្រទេសទាំងពីរ។

ប្រធានាធិបតី Volodymyr Zelenskyy បាននិយាយកាលពីថ្ងៃពុធថា សកម្មភាពរបស់រុស្ស៊ីបានបំផ្លាញផលិតផលកសិកម្មដែលមានគោលដៅទៅប្រទេសចិន ដែលជាភាគីមួយមានទំនាក់ទំនងជាមួយទីក្រុងម៉ូស្គូ។ លោក​បាន​បន្ថែម​ថា មនុស្ស​គ្រប់​រូប​ទទួល​រង​ផល​ប៉ះពាល់​ ដោយ​អ្វី​ដែល​លោក​ហៅ​ថា «ភេរវកម្ម» របស់​រុស្ស៊ី។ ជាមួយគ្នានេះ កាល​ពី​ថ្ងៃ​ព្រហស្បតិ៍ទាហាន​រុស្ស៊ី​ក៏បាន​បំផ្លាញ​អគារ​កុងស៊ុល​ចិន នៅ Odesa ដែលវា​បង្ហាញ​ថា ​កងកម្លាំង​រុស្ស៊ី​បាន​ចូលរួម​ក្នុង​ការ​វាយប្រហារ​មិន​រើសមុខទេ៕

អត្ថបទ៖ លីដា
ប្រភព៖ NHK