យោង​តាម​សេចក្ដីណែនាំ​របស់ក្រ​សួង​អភិវឌ្ឍន៍​ជនបទ​ ​ស្ដីពី​វិធាន​កាត់បន្ថយ​ការ​ខ្វះខាត​ទឹក​ប្រើប្រាស់​ ​ដោយសារ​គ្រោះ​រាំងស្ងួត​ បានឲ្យដឹងថា ​នៅដើម​ឆ្នាំ​ ​២០១៩​ ​នេះព្រះរាជាណាចក្រ​កម្ពុជា​នឹង​រង​ទទួល​ (​ដោយប្រយោល)​ ​ពី​ឥទ្ធិពលបាតុភូត​អែ​លនី​ (El Nino) ​។​ ​ឥទ្ធិពល​នៃ​បាតុភូត​​នេះ​ នឹង​បង្ក​ឲ្យ​អាកាសធាតុ​នៅ​កម្ពុជា​នារ​ដូវ​ប្រាំង​នេះ​ ​(​ពិសេស​ក្នុង​ខែមេសា​ ​និង​ ​ខែឧសភា​)​ ​មាន​សភាព​ក្ដៅ​ហួតហែង​ខ្លាំង​ ​សីតុណ្ហភាព​អតិបរមានៅពេលខ្លះ​អាច​ហក់​ឡើង​ដល់​ ​៤០​ ​ទៅ​ ​៤២ អង្សា​រ​សេ​។​ ​ការ​កើនឡើង​កំ​ដៅ​នេះ​នឹង​ធ្វើ​ឲ្យ​មានការ​ខ្វះខាត​ទឹក​សម្រាប់ប្រើប្រាស់​ជាប្រចាំថ្ងៃរបស់​មនុស្ស​ ​និង​ សត្វ​ ​។​ ​ដើម្បី​កាត់បន្ថយការខ្វះខាត​ទឹក​សម្រាប់ប្រើប្រាស់ ​ក្រសួង​អភិវឌ្ឍន៍​ជនបទ​ ​បាន​ចេញ​វិធានការ ៤ ចំណុច​ ​សម្រាប់​ប្រធាន​នាយកដ្ឋាន​ជំនាញ​ ​និង​ ប្រធានមន្ទីរ​រាជធានី​ ​ខេត្ត​ ​ដែល​ស្ថិតនៅ​ក្រោម​ឱវាទ​ក្រសួង​ត្រូវ​អនុវត្ត​ដូច​ខាងក្រោម​នេះ​ ៖​ ​

​១​.​ត្រូវ​ចុះ​ពិនិត្យមើល​ ​អណ្តូង​ ​ស្រះទឹក​ ​និង ​រក​វិធី​ដោះស្រាយ​ជាបន្ទាន់​នៅពេល​ ​អណ្តូង​ ​(​ខូច​)​ ​និង​ស្រះទឹក​ ​(​រីងស្ងួត​)​ ។

​២​.​ត្រូវ​ធ្វើការ​ណែនាំ​ ​និង​ អប់រំ​ផ្សព្វផ្សាយ​ ​ដល់​ប្រជាពលរដ្ឋ​ដែល​រស់នៅ​តាម​តំបន់​ដែល​ងាយ​រងគ្រោះ​ ​ដោយសារ​ខ្វះខាត​ទឹក​ឲ្យបង្កើន​ការ​យកចិត្ត​ទុកដាក់​ខ្ពស់​ក្នុង​ការ​ថែរក្សា​ប្រភព​ទឹក​សម្រាប់​ប្រើប្រាស់​ប្រចាំថ្ងៃ​ ​និង​ប្រើប្រាស់​ទឹក​ដោយ​លក្ខណៈ​សន្សំសំចៃ​ ​។​

​៣​.​ត្រូវ​ទំនាក់ទំនង​ជាមួយ​អាជ្ញាធរ​មូលដ្ឋាន​ ​ដៃគូ​អភិវឌ្ឍន៍​នានា​ ​អង្គការ​ជាតិ​ ​និង ​អន្តរជាតិ​ដើម្បី​ឆ្លើយ​តប​ភ្លាម​ៗ​ ​ដល់​ប្រជាពលរដ្ឋ​ដែល​កំពុង​ខ្វះខាត​ទឹក​ប្រើប្រាស់​ ​។​

​៤​.​ ​ត្រូវ​ធ្វើ​របាយការណ៍​ ​និង​ រាយការណ៍​ជាប្រចាំ​មក​ក្រសួង​ ​ដើម្បី​មាន​វិធានការ​បន្ទាន់​ ៕​

អត្ថបទ៖ សេម