ខេត្តព្រះសីហនុ​៖ នៅថ្ងៃទី២៣ ខែវិច្ឆិកា​ ឆ្នាំ២០២៣ យោងតាមគណនីហ្វេសប៊ុកផ្ទាល់របស់ ឯកឧត្តម គួច ចំរើន អភិបាលខេត្តព្រះសីហនុ បានប្រកាសឱ្យក្រុមហ៊ុន ដែលបានកាត់ថ្នល់ ក្នុងក្រុងព្រះសីហនុ ប្រញ៉ាប់មកជួសជុលឱ្យដូចដើម បើមិនឆាប់មកជួសជុលទេ នឹងចាត់វិធានការណ៍តាមច្បាប់។

តាមរយៈការបង្ហោះរបស់ ឯកឧត្តម គួច ចំរើន បានសរសេររៀបរាប់យ៉ាងដូច្នេះថា៖ «បុគ្គល ឬ ក្រុមហ៊ុន ដែលបានកាត់ថ្នល់ សូមប្រញ៉ាប់មកធ្វើការជួសជុល អោយមានគុណភាពដូចដើម ពេលមកសុំ សន្យាច្បាស់ណាស់ បែបនេះទទួលមិនបានទេ សុំលើកក្រោយលំបាកបន្តិចហើយ បើមិនឆាប់មកជួសជុលទេ ខ្ញុំចាត់វិធានការណ៍ហើយ សូមកុំអោយមានអ្នកមកអន្តរាគមន៍។ » បន្ទាប់ពីឯកឧត្តម បានបង្ហោះសារនេះរួច ឃើញមានបងប្អូនប្រជាពលរដ្ឋជាច្រើនចូលទៅខមិន គាំទ្រយ៉ាងពេញទំហឹង ដោយសារនៅទីតាំងទាំងនេះ គឺរាងអុកពិបាកក្នុងការធ្វើដំណើរជាខ្លាំង៕

ប្រភព៖ គួចចំរើន/KuochChamroeun