រាជធានីភ្នំពេញ៖ នៅថ្ងៃទី១៧ ខែមករា ឆ្នាំ២០២៤ យោងតាមសេចក្ដីជូនដំណឹងរបស់ នាយកដ្ឋានរដ្ឋបាល បានឱ្យដឹងថា អគ្គនាយកដ្ឋានអត្តសញ្ញាណកម្ម នឹងរៀបចំធ្វើតេស្តពិនិត្យទឹកនោម រកសារធាតុញៀន ចំពោះថ្នាក់ដឹកនាំ ចាប់ពីថ្នាក់អនុប្រធាននាយកដ្ឋាន រហូតដល់មន្ត្រី នៅថ្ងៃទី១៨-១៩-២០ ខែមករា ឆ្នាំ២០២៤។

ដើម្បីពង្រឹងការអនុវត្តអនុសាសន៍ណែនាំដ៏ខ្ពង់ខ្ពស់របស់ ឯកឧត្តមអតិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អគ្គនាយកដ្ឋានអត្តសញ្ញាណកម្ម នឹងរៀបចំធ្វើតេស្តពិនិត្យទឹកនោមរកសារធាតុញៀន ចំពោះថ្នាក់ដឹកនាំ ចាប់ពីថ្នាក់អនុប្រធាននាយកដ្ឋាន រហូតដល់មន្ត្រី នៃអគ្គនាយកដ្ឋានអត្តសញ្ញាណកម្ម ដែលនឹងប្រព្រឹត្តទៅនៅថ្ងៃទី១៨-១៩-២០ ខែមករា ឆ្នាំ២០២៤។

ជាមួយគ្នានេះ អគ្គនាយកដ្ឋាន តម្រូវថ្នាក់ដឹកនាំចាប់ពីអនុប្រធាននាយកដ្ឋាន រហូតដល់មន្ត្រី ត្រូវចូលរួមធ្វើតេស្តរកសារធាតុញៀនទាំងអស់ហាមអវត្តមាន។ ករណីដែលថ្នាក់ដឹកនាំ និងមន្ត្រីដែលអាក់ខាន ពុំបានចូលរួមតេស្ត ស្នើឱ្យនាយកដ្ឋានជំនាញ បញ្ជាក់អំពីមូលហេតុឱ្យបានច្បាស់លាស់។

ក្នុងន័យនេះ នាយកដ្ឋានរដ្ឋបាល-សរុប ស្នើសុំ ឯកឧត្ដម លោកប្រធាននាយកដ្ឋាន ផ្សព្វផ្សាយ ដល់ថ្នាក់ដឹកនាំចាប់ពីអនុប្រធាននាយកដ្ឋាន រហូតដល់មន្ត្រី ចូលរួមធ្វើតេស្តរកសារធាតុញៀន ដូចមានតារាង បែងចែកកាលបរិច្ឆេទ និងទីកន្លែងធ្វើតេស្តជូនភ្ជាប់មកជាមួយ ៕

ប្រភព៖ លោក Sorn Sopheak-ស៊ន សុភក្រ្ត