ស្ថាបនិកសេវាផ្ញើសារដ៏មានប្រជាប្រិយភាព បាននិយាយកាលពីថ្ងៃព្រហស្បតិ៍ថា មនុស្សម្នាជាច្រើនបានប្រមូលផ្ដុំទៅ Download និងចុះឈ្មោះកម្មវិធី Telegram ក្នុងអំឡុងពេលបណ្តាញសង្គម Facebook កំពុងមានបញ្ហាបច្ចេកទេស ដែលមិនត្រឹមតែក្រឡុកបណ្តាញសង្គមយក្សមួយនេះទេ សូម្បីតែបងប្អូនរបស់វាដូចជា៖ Messenger WhatsApp និង Instagram។

លោក Pavel Durov អគ្គនាយកក្រុមហ៊ុន Telegram បានសរសេរថា៖ «ខ្ញុំឃើញមានអ្នកប្រើប្រាស់ថ្មីចំនួន ៣ លាននាក់ បានចុះឈ្មោះក្នុងបណ្តាញ Telegram ក្នុងរយៈពេល ២៤ម៉ោង ចុងក្រោយ» «ល្អហើយ ព្រោះយើងមានភាពជាឯកជនពិត និងទីកន្លែងមិនកំណត់សម្រាប់មនុស្សគ្រប់គ្នា»។

ក្រុមហ៊ុន Telegram ក៏បានរាយការណ៍ថា ខ្លួនមានអ្នកប្រើប្រាស់សកម្មចំនួន ២០០ លាននាក់ កាលពីឆ្នាំមុន ដូច្នេះការកើនឡើងកាលពីថ្ងៃពុធ គឺជាការកើនឡើងសមហេតុផលសម្រាប់សេវានេះ។ ប៉ុន្តែយ៉ាងណាក៏ដោយ Telegram មិនបានឆ្លើយតបភ្លាមៗចំពោះសំណើសុំយោបល់បន្ថែមនោះទេ៕

អត្ថបទ៖ លីដា
ប្រភព៖ cnet