តុលាការសហព័ន្ធអាមេរិកបង្គាប់ឲ្យលោក Trump បង់ប្រាក់សំណង ៨៣,៣លានដុល្លារទៅកាន់លោកស្រី E. Jean Carroll ខណៈលោក Trump នឹងប្តឹងឧទ្ធរណ៍

អាមេរិក៖ តុលាការសហព័ន្ធប្រចាំទីក្រុង Manhattan បានបង្គាប់ឲ្យអតីតប្រធានាធិបតីអាមេរិកលោក Donald Trump ត្រូវបង់ប្រាក់ចំនួន ៨៣,៣លានដុល្លារឲ្យទៅលោកស្រី E. Jean Carroll ជុំវិញរឿងអាស្រូវដែលមានអាយុកាលដ៏យូរអង្វែងមួយ នេះបើយោងតាមការចុះផ្សាយរបស់បណ្តាញសារព័ត៌មាន The Strait Time នៅក្នុងថ្ងៃសៅរ៍ ទី២៧ ខែមករានេះ។ សេចក្តីសម្រេចខាងលើនេះត្រូវបានធ្វើឡើងតបតាមពាក្យបណ្តឹងរបស់លោកស្រី E. Jean Carroll ដែលអះអាងថា លោក Donald Trump បានបំផ្លាញកេរ្តិ៍ឈ្មោះរបស់គាត់ក្នុងនាមជាអ្នកកាសែតដ៏គួរឲ្យទុកចិត្តម្នាក់តាមរយៈការបដិសេដថា លោក Donald Trump មិនបានចាប់រំលោភគាត់នោះទេ។

គួរកត់សម្គាល់ថា បច្ចុប្បន្ននេះលោកស្រី E. Jean Carroll មានអាយុ ៨០ឆ្នាំទៅហើយ ខណៈរឿងរ៉ាវចម្រូងចម្រាសខាងលើនេះបានកើតឡើងកាលពីពាក់កណ្តាលទសវត្សរ៍ឆ្នាំ១៩៩០ម្លេះ និងបានកើតឡើងនៅក្នុងអគារពាណិជ្ជកម្ម Bergdorf Goodman ដែលមានទីតាំងស្ថិតនៅក្នុងទីក្រុង​ Manhattan។ នៅក្នុងសាលក្រមចំពោះករណីខាងលើនេះតុលាការសហព័ន្ធក្រុង Manhattan បានបញ្ជាក់ថា នៅក្នុងប្រាក់សំណងទាំង ៨៣,៣លានដុល្លារនោះ គឺមានប្រាក់សំណងចំនួន ១៨,៣លានដុល្លារជាសំណងសម្រាប់ការខូចខាតកេរ្តិ៍ឈ្មោះនិងរាងកាយរបស់លោកស្រី E. Jean Carroll  ខណៈ ៦៥លានដុល្លារផ្សេងទៀតគឺជាប្រាក់សំណងចំពោះការដាក់ទណ្ឌកម្មឲ្យរូបគាត់ត្រូវរស់នៅជាមួយរឿងអាស្រូវអស់រយៈពេលជាច្រើនកន្លងមកនេះ។​ យ៉ាងណាក្តី សម្រាប់លោក Donald Trump ដែលត្រូវបានគេមើលឃើញថា គឺជាបុគ្គលមានប្រជាប្រិយភាពខ្លាំងក្នុងការឈរឈ្មោះជាបេក្ខភាពប្រធាធិបតីអាមេរិកនៅចុងឆ្នាំនេះនឹងប្តឹងឧទ្ធរណ៍ចំពោះសាកក្រមខាងលើនេះ៕

អត្ថបទ៖ ភក្តី

ប្រភព៖ The Strait Time