ខេត្តកំពត៖ នៅថ្ងៃទី០៣ ខែកុម្ភៈ ឆ្នាំ២០២៤ យោងតាមគណីហ្វេសប៊ុកផ្ទាល់របស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការដ្ឋាននគរបាលខេត្តកំពត បានប្រកាសផ្ដល់ជូនរង្វាន់ចំនួន ១លានរៀល ចំពោះបងប្អូនដែលផ្តល់ដំណឹងដល់សមត្ថកិច្ច រកឃើញម្ចាស់រថយន្តFORD RAPTOR ស្លាកលេខ MENGPECH ។

តាមរយៈការបង្ហោះឱ្យដឹងពីផេកផ្លូវការរបស់ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានសរសេររៀបរាប់ថា៖ « សូមជូនរង្វាន់ចំនួន ១លានរៀល ចំពោះបងប្អូនណាដែលផ្តល់ដំណឹងដល់សមត្ថកិច្ចរកឃើញរថយន្តដែលមានភិនភាគខាងក្រោមនេះ សូមទាក់ទងមកលេខទូរស័ព្ទនេះ 092937705 ហើយយើងនឹងរក្សាការសម្ងាត់ជូន។

លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានឱ្យដឹងបន្ថែមថា៖ « ម្ចាស់រថយន្តFORD RAPTOR នេះ វត្ថុតាងក៏មិនយកមកប្រគល់អោយសមត្ថិកិច្ច ហើយថែមទាំងមិនចូលខ្លួនមកបំភ្លឺអោយសមត្ថកិច្ច ប្អូនមើលស្រាលច្បាប់ពេកហើយ កុំគិតថាសងសំណងរដ្ឋប្បវេណីហើយប្អូនរួចខ្លួនអោយសោះប្អូន ផល្លា សុីម៉េង រង់ចាំមើលច្បាប់អនុវត្តយ៉ាងណាជាមួយប្អូន ។ »

សូមជម្រាបជូនថា លោកឧត្តមសេនីយ៍ទោ ម៉ៅ ច័ន្ទមធុរិទ្ធ នៅថ្ងៃទី៣០ ខែមករា ឆ្នាំ២០២៤ បានជូនដំណឹងដល់ម្ចាស់រថយន្ត Ford ពណ៌ស ស្លាកលេខ MENGPECH ឱ្យចូលខ្លួនមកដោះស្រាយក្នុងករណីបង្កគ្រោះថ្នាក់ចរាចរណ៍បណ្តាលអោយជនរងគ្រោះពីរនាក់​ បាត់បង់ជីវិត កាលពីថ្ងៃទី២៨ ខែមករា ឆ្នាំ២០២៤ វេលាម៉ោង ១២៖៣០នាទី នៅក្នុងភូមិសាស្ត្រស្រុកដងទង់ អោយបានឆាប់ ម្ចាស់រថយន្តមិនរួចខ្លួននោះទេ ប្រសិនបើមិនចូលខ្លួនដោះស្រាយ។ លោកឧត្តមសេនីយ៍ទោ សំណូមពរដល់បងប្អូនជួយស៊ែរអោយបានច្រើន ដើម្បីអោយម្ចាស់ឡានបានឃើញ ក្រែងមិនដឹងថាខ្លួនបានបង្កគ្រោះថ្នាក់ចរាចរណ៍ ៕

ប្រភព៖ ស្នងការដ្ឋាននគរបាលខេត្តកំពត