រាជធានីភ្នំពេញ៖ នៅថ្ងៃទី២៨ ខែឧសភា ឆ្នាំ២០២៤ យោងតាមការចុះផ្សាយរបស់ ក្រសួងព័ត៌មាន បានឱ្យដឹងថា តាមការប្រមូលទិន្នន័យនៃការស្វែងរកទីតាំងថ្ងៃរះស្អាតបំផុតជុំវិញពិភពលោករបស់ Mornings.co.uk កាលពីពេលថ្មីៗនេះបានបង្ហាញថា ប្រទេសកម្ពុជាឈរនៅលំដាប់លេខរៀងទី១ ជាកន្លែងមើលថ្ងៃរះស្អាតបំផុតក្នុងចំណោម ៧២ ប្រទេសនៅលើពិភពលោក។

ប្រភពដដែលបានបន្តថា តាមការស្រាវជ្រាវបានបង្ហាញទៀតថា ក្នុងចំណោម ៧២ប្រទេស កម្ពុជាបានឈរនៅលំដាប់លេខរៀងទី១ ដែលមានប្រាសាទអង្គរវត្ត ក្នុងទឹកដីនៃខេត្តសៀមរាប សម្រាប់ទស្សនាព្រះអាទិត្យរះល្អបំផុតនៅលើពិភពលោក។ បន្ទាប់មកប្រាសាទ Borobudur ប្រទេសឥណ្ឌូនេស៊ី ជាប់ចំណាត់ថ្នាក់ទី៤ ហើយប្រាសាទ Bagan ប្រទេសមីយ៉ាន់ម៉ា​ជាប់ចំណាត់ថ្នាក់ទី ៧។ខណៈ ឧទ្យានជាតិ Murchison Falls ក្នុងប្រទេសអ៊ូហ្គាន់ដា ឈរនៅលំដាប់លេខរៀងទី៧២។

គួររំលឹកថា កាលថ្ងៃទី២១ ខែមីនា ឆ្នាំ២០២៤​ នៅប្រាសាទអង្គរវត្តមានភ្ញៀវចូលមកទស្សនាព្រះអាទិត្យរះឡើងចំកំពូល​កណ្តាល​នៃប្រាសាទអង្គរវត្ត ឬសមរាត្រី ចំនួន ១០ ១៥៤ នាក់​ ក្នុងនោះភ្ញៀវបរទេសចំនួន ២​ ៥៧៥នាក់​ និងភ្ញៀវខ្មែរចំនួន​ ៧​ ៥៧៩នាក់​ ៕

ប្រភព៖ ក្រសួងព័ត៌មាន