ព័ត៌មានជាតិ

កិច្ចបដិបត្តិសមាធិ ថ្វាយព្រះវិញ្ញាណក្ខន្ធ ព្រះបរមសព សម្តេចព្រះមហាសង្ឃរាជ ទេព វង្ស មានព្រះសង្ឃ និងពុទ្ធបរិស័ទ ចូលរួមជិត ១ម៉ឺនអង្គ/នាក់

BY: Khmernote Media

: June 1, 2024

រាជធានីភ្នំពេញ៖ យោងតាមការចុះផ្សាយរបស់ ទីភ្នាក់ងារសារព័ត៌មានកម្ពុជា បានឱ្យដឹងថា ក្រោមបរិយាកាសដ៏អធិកអធម នៃពិធីកិច្ចបដិបត្តិសមាធិក្នុងព្រះរាជពិធីមហាបង្សុកូលថ្វាយព្រះវិញ្ញាណក្ខន្ធ ព្រះបរមសពសម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា រាជរដ្ឋាភិបាល ក្រសួងធម្មការ និងគណៈសង្ឃនាយកនៃព្រះរាជាណាចក្រកម្ពុជា បានរៀបចំពិធីបដិបត្តិសមាធិមួយនៅទីធ្លាមុខវត្តឧណ្ណាលោម នាព្រលប់ថ្ងៃទី២៧ ខែឧសភា ឆ្នាំ២០២៤ ដើម្បីផ្តល់ឱកាសឱ្យព្រះសង្ឃ និងពុទ្ធបរិស័ទបានចូលរួមធ្វើបុណ្យសន្សំកុសលខ្លួនឯងផង និងឧទ្ទិសមហាកុសលថ្វាយព្រះវិញ្ញាណក្ខន្ធ សម្តេចព្រះមហាសង្ឃរាជ ទេព វង្ស ហើយក៏ជាការសម្ដែងនូវមនោសញ្ចេតនាកតញ្ញូតវេទីប្រកបដោយការគោរពដ៏ខ្ពង់ខ្ពស់ ថ្វាយព្រះមហាករុណាទិគុណដ៏ប្រសើរថ្លៃថ្លាប្រកបដោយសេចក្តីនឹករលឹកសោកស្ដាយរកអ្វីប្រៀបផ្ទឹមពុំបានជាមួយនឹងសេចក្ដីអំណរព្រះគុណជាអនេកគ្មានថ្ងៃបំភ្លេចបានឡើយ។

ពិធីបដិបត្តិសមាធិបានចាប់ផ្តើមនៅម៉ោង ៥ល្ងាច ថ្ងៃទី២៧ ខែឧសភា ឆ្នាំ២០២៤ ដោយមានព្រះសង្ឃប្រមាណ ៥ ០០០អង្គ ដឹកនាំដោយសម្ដេចព្រះពុទ្ធជ័យមុនី ឃឹម សន ព្រះប្រធានលេខាធិការដ្ឋានគណៈសង្ឃនាយក និងជាព្រះមេគណរាជធានីភ្នំពេញ បាននិមន្តចាកចេញពីវត្តបទុមវត្តីឆ្ពោះទៅកាន់មុខវត្តឧណ្ណាលោម ដែលជាកន្លែងប្រារព្ធពិធីបដិបត្តិសមាធិ ដែលនៅទីនោះបានរៀបចំរួចស្រេចនូវកម្រាលសម្រាប់គង់ របស់ព្រះសង្ឃ ៥ ០០០អង្គ ដែលនៅពីមុខកម្រាល នោះមានទឹកបរិសុទ្ធ១ដប ជាមួយនឹងផ្កាឈូក១ទង តម្រៀបគ្នាជាជួរនៅលើទីធ្លាមុខវត្តឧណ្ណាលោម រហូតដល់មាត់ច្រាំងទន្លេ។ នៅជុំវិញទីធ្លាសម្រាប់ព្រះសង្ឃគង់សមាធិ មានពុទ្ធបរិស័ទ ជាច្រើនកុះករក្នុងសម្លៀកបំពាក់អាវស សំពត់ស ពានាកន្សែងស មានទាំងវ័យចំណាស់ វ័យកណ្តាល និងយុវជន យុវតី ក្នុងឯកសណ្ឋានជាសិស្សសាលាចូលរួមផងដែរ។ បើតាមគណៈកម្មការរៀបចំពិធីបុណ្យកម្មវិធីសមាធិនេះ មានព្រះសង្ឃ និងពុទ្ធបរិស័ទប្រមាណជិត ១ម៉ឺន អង្គ/នាក់ចូលរួម គឺលើសពីការគ្រោងទុក។

ក្នុងនោះរាជរដ្ឋាភិបាលបានសម្រេចយកថ្ងៃទី០៣ ខែមិថុនា ឆ្នាំ២០២៤ ជាថ្ងៃថ្វាយព្រះភ្លើងដល់ព្រះបរមសព សម្តេចព្រះអគ្គមហាសង្ឃរាជ នៃព្រះរាជាណាចក្រកម្ពុជា ហេតុនេះរាជរដ្ឋាភិបាល ក្រសួងធម្មការ និងសាសនា និងគណៈសង្ឃនាយក នៃព្រះរាជាណាចក្រកម្ពុជា បានសម្រេចរៀបចំមហាព្រឹត្តិការណ៍មួយនេះឡើង គឺកិច្ចបដិបត្តិសមាធិក្នុងព្រះរាជពិធីមហាបង្សុកូលថ្វាយព្រះវិញ្ញាណក្ខន្ធ ព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា។

កម្មវិធីកិច្ចបដិបត្តិសមាធិគឺជាអ្វីដែលសិស្សគុណ និងពុទ្ធបរិស័ទទាំងអស់ដែលជាពុទ្ធសាសនិកអាចធ្វើបានសម្រាប់បុគ្គល ឬឧបការីជន ដែលលាចាកលោកនេះទៅហើយ ដូចនេះមានតែការធ្វើបុណ្យឧទ្ទិសកុសល ដែលក្នុងនោះក៏មានពិធីកិច្ចបដិបត្តិសមាធិនេះផងដែរ នេះជាអ្វីដែលសិស្សគុណទាំងអស់ ក៏ដូចជាពុទ្ធបរិស័ទអាចធ្វើបានសម្រាប់សម្រួមចិត្តឱ្យស្ងប់ នៅក្នុងកុសលធម៌ និងឧទ្ទិសកុសលថ្វាយព្រះវិញ្ញណក្ខន្ធ សម្ដេចព្រះមហាសង្ឃរាជ និងជាការគោរពចំពោះព្រះវីរភាពរបស់ព្រះអង្គដែលបានលះបង់ស្ទើរពេញមួយជីវិតដើម្បីការរស់ឡើងវិញ និងការរីកចម្រើននៃព្រះពុទ្ធសាសនានៅកម្ពុជា។

សម្តេចព្រះមហាអរិយវង្សបណ្ឌិត យ៉ន សេងយៀត មានសង្ឃដីកាបន្តថា៖ «កិច្ចបដិបត្តិសមាធិ» ថ្វាយព្រះវិញ្ញាណក្ខន្ធ ព្រះបរមសព សម្ដេចព្រះអគ្គមហាសង្ឃរាជាធិបតី ក្នុងគោលបំណង៖ ទី១. ក្នុងនាមសិស្សគុណ និងពុទ្ធបរិស័ទទូទាំងប្រទេស ដែលកំពុងបាត់បង់នូវសម្ដេចព្រះមហាសង្ឃរាជ ហើយអ្វីដែលយើងអាចធ្វើបានគឺមានតែការឧទ្ទិសបុណ្យកុសលថ្វាយព្រះវិញ្ញាណក្ខន្ធចំពោះបដិសទ្ធិព្រះវិញ្ញាណរបស់ព្រះអង្គ ទី២. គឺការគោរពចំពោះព្រះវិញ្ញាណក្ខន្ធព្រះអង្គ ដែលបង្ហាញពីទឹកចិត្ត និងស្មារតីនៃការចងចាំព្រះអង្គ និងរលឹកពីគំរូវីរភាព និងការសម្ដែងនូវមនោសញ្ចេតនាកតញ្ញូកតវេទី ប្រកបដោយការគោរពដ៏ខ្ពង់ខ្ពស់ ថ្វាយព្រះមហាករុណាទិគុណដ៏ប្រសើរថ្លៃថ្លា ប្រកបដោយសេចក្តីនឹករលឹក សោកស្ដាយរកអ្វីប្រៀបផ្ទឹមពុំបាន ជាមួយនឹងសេចក្ដីអំណរព្រះរាជគុណជាអនេកគ្មានថ្ងៃបំភ្លេចបាន។

កិច្ចបដិបត្តិសមាធិនេះ គឺជាមហាព្រឹត្តិការណ៍សាសនាមួយដ៏ធំ ដែលមហាព្រឹត្តិការណ៍បែបនេះធ្លាប់បានធ្វើម្តងក្នុងព្រឹត្តិការណ៍នៃពិធីបដិបត្តិសមាធិថ្វាយ ព្រះវិញ្ញាណក្ខន្ធ ព្រះបរមសព សម្តេចព្រះបរមរតនកោដ្ឋ នៅមុខព្រះបរមរាជវាំង ដែលមានព្រះសង្ឃ និងពុទ្ធបរិស័ទចូលរួមប្រមាណជាង ២ម៉ឺននាក់។ លើកនេះបើតាមគណសង្ឍនាយកនៃព្រះរាជាណាចក្រកម្ពុជាក៏មានបំណងធ្វើឱ្យបានធំដែរ ក៏ប៉ុន្តែដោយសារតែទីតាំងមិនអំណោយផល មិនអាចដាក់មនុស្សបានដល់រាប់ម៉ឺននាក់នោះទេ អ្នកជំនាញបញ្ជាក់ថាទីធ្លាមុខវត្តឧណ្ណាលោម នេះអាចដាក់បានព្រះសង្ឃត្រឹម ៥ ០០០ អង្គប៉ុណ្ណោះ។

សម្ដេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស បានបូជាកម្លាំងកាយ ប្រាជ្ញាស្ទើរពេញមួយជីវិតរបស់ព្រះអង្គចំពោះជាតិ សាសនា ព្រះមហាក្សត្រ ពិសេសក្រោយថ្ងៃប្រទេសជាតិបានរំដោះចេញពីរបបខ្មៅងងឹតនៃរបបប្រល័យពូជសាសន៍ ប៉ុល ពត ក្នុងព្រះជន្មាយុបាន ៤៨វស្សា ព្រះអង្គបាននិមន្តបួសឡើងវិញនៅថ្ងៃទី១៩ ខែកញ្ញា ឆ្នាំ១៩៧៩ និងមានឋានៈជាព្រះគ្រូវិន័យធរក្នុងវត្តឧណ្ណាលោមរាជធានីភ្នំពេញ។ ព្រះអង្គ បានបំបួសព្រះសង្ឃរាប់ម៉ឺនអង្គ និងបានជំរុញបើកទីអារ៉ាមឡើងវិញនៅគ្រប់ឃុំ ស្រុក ខេត្តទូទាំងប្រទេស ធ្វើឱ្យវិស័យសាសនានៅកម្ពុជាមានការរីកចម្រើនឡើង។ ព្រះអង្គនៅ ក្នុងចិត្តរបស់ប្រជាពលរដ្ឋខ្មែរវ័យចំណាស់ គឺជាអ្នកធ្វើឱ្យព្រះពុទ្ធសាសនារីកចម្រើន និងសុខដុម បន្ទាប់ពីរបបខ្មែរក្រហម។

ឧបាសិកា កុល ឡា អាយុ ៧០ឆ្នាំ ដែលអញ្ជើញមកពីឃុំក្រោលគោ ខេត្តស្វាយរៀង បានថ្លែងថា៖ «ដោយសារការគោរព និងមានភាពអាឡោះអាល័យចំពោះសម្តេច ដែលកាលព្រះអង្គនៅមានព្រះជន្ម ព្រះអង្គបានធ្វើឱ្យវិស័យព្រះពុទ្ធសាសនាមានការរីកចម្រើន ធ្វើឱ្យប្រជាពលរដ្ឋមានវត្តអារ៉ាម សម្រាប់ប្រតិបត្តិធម៌ ទៅតាមទំនៀមទម្លាប់ព្រះពុទ្ធសាសនា។ ព្រះអង្គធ្លាប់មានសង្ឃដីកាអប់រំ ឱ្យយើងចេះសាមគ្គីគ្នា ចេះដឹងគុណចំពោះអ្នកដែលបានជួយយើង។ ដូច្នេះ ពេលនេះជាឱកាសចុងក្រោយដែលខ្ញុំអាចមក ធ្វើបុណ្យឧទ្ទិសកុសលថ្វាយព្រះអង្គ»។ ឧបាសិកា កុល ឡា ក៏បានអរគុណចំពោះរាជរដ្ឋាភិបាលដែលបានយកចិត្តទុកដាក់រៀបចំពិធីបុណ្យ ព្រះបរមសព សម្តេច ទេព វង្ស បានយ៉ាងអធិកអធមស័ក្តិសមនឹងព្រះកិត្តិនាមរបស់ព្រះអង្គ។

ចំណែកឧបាសិកា អ៊ុន សួន អាយុ ៧៥ឆ្នាំ មកពីឃុំក្រោលគោ ខេត្តស្វាយរៀងដែរ បានឱ្យដឹងថា៖ «ខ្ញុំបានចំណាយថវិកាផ្ទាល់ខ្លួនធ្វើដំណើរពីខេត្តស្វាយរៀងមកដោយការពេញចិត្ត ដើម្បីធ្វើបុណ្យប្រគេនព្រះសង្ឃ ដើម្បីឧទ្ទិសកុសលថ្វាយដល់សម្តេចសង្ឃ ដែលព្រះអង្គបានខិតខំធ្វើឱ្យព្រះពុទ្ធសាសនារីកចម្រើនប្រសើរឡើង។ សូមឱ្យព្រះវិញ្ញាណក្ខន្ធព្រះអង្គបានទៅកាន់ឋានបរមសុខ កុំបីឃ្លៀងឃ្លាតឡើយ»។

យុវសិស្ស ធី លីហុង មកពីវិទ្យាល័យព្រះស៊ីសុវត្តិ កំពុងអង្គុយបត់ជើងជាមួយមិត្តរួមថ្នាក់នៅមុខវត្តឧណ្ណាលោម បានសម្ដែងការចាប់អារម្មណ៍របស់ខ្លួនថា៖ «ការមកចូលរួមពិធីបដិបត្តិសមាធិ នាពេលនេះគឺដោយទឹកចិត្តគោរពចំពោះសម្តេចព្រះសង្ឃរាជនៃកម្ពុជា ដែលព្រះអង្គបានលាលោកយើងទៅហើយ ក្នុងនាមជាយុវជន និងជាពុទ្ធសាសនិកមួយរូប ខ្ញុំពិតជាមានការអាឡោះអាល័យចំពោះព្រះអង្គ និងមានការសោកស្តាយចំពោះការបាត់បង់ធនធានមនុស្សរបស់ជាតិ ពិសេសសម្រាប់មនុស្សដែលមានចំណេះដឹងដ៏ខ្ពង់ខ្ពស់»។ យុវសិស្ស ធី លីហុង បានបន្តថា ការមកចូលរួមនេះគឺទីមួយរក្សាចិត្តឱ្យស្ងប់ និងឧទ្ទិសកុសលផលបុណ្យថ្វាយព្រះអង្គ និងបន់ស្រន់សុំឱ្យព្រះវិញ្ញាណក្ខន្ធ ព្រះអង្គបានទៅដល់សុគតិភពកុំបីឃ្លៀងឃ្លាតឡើយ។

ទោះបីជាមេឃមានភ្លៀងយ៉ាងណាក៏ដោយព្រះសង្ឃ និងពុទ្ធបរិស័ទ ជាច្រើនអង្គ/នាក់ បានបន្តធ្វើកិច្ចបដិបត្តិសមាធិក្រោមដំណក់ទឹកភ្លៀង មិនបាននិមន្តចាកចេញនោះឡើយ នៅពេលចប់កិច្ចបដិបត្តិសមាធិ ទាំងព្រះសង្ឃ និងពុទ្ធបរិស័ទ បានត្រឡប់ទៅវិញទាំងទទឹកជោក។ កិច្ចបដិបត្តិសមាធិក្នុងព្រះរាជពិធី មហាបង្សុកូលថ្វាយព្រះវិញ្ញាណក្ខន្ធ ព្រះបរមសព សម្តេចព្រះអគ្គមហាសង្ឃរាជាធិបតី កិត្តិឧទ្ទេសបណ្ឌិត ទេព វង្ស គឺជាពិធីបុណ្យធំចុងក្រោយមុនឈានដល់ ព្រះពិធីបុណ្យមហាសង្ឃទាន ថ្វាយព្រះភ្លើង អភិសេក ព្រះបរមអដ្ឋិ និងឆាកមហាបង្សុកូលឆ្លងខួបគម្រប់១០០ថ្ងៃ ថ្វាយព្រះរាជមហាកុសល ព្រះវិញ្ញាណក្ខន្ធ ព្រះបរមសព។ ក៏ប៉ុន្តែនៅក្នុងរយៈពេលពីពេលនេះទៅដល់ថ្ងៃថ្វាយព្រះភ្លើងព្រះបរមសព ពុទ្ធបរិស័ទនៅតែមានឱកាសអញ្ជើញគោរពព្រះវិញ្ញាណក្ខន្ធ និងបង្សុកូលថ្វាយព្រះវិញ្ញាណក្ខន្ធ ព្រះបរមសព និងប្រគេនចង្ហាន់ព្រះសង្ឃ ទៅតាមសទ្ធាជ្រះថ្លា ចាប់ពីម៉ោង៨ ព្រឹករហូតដល់ពេលយប់៕

ប្រភព៖ ទីភ្នាក់ងារសារព័ត៌មានកម្ពុជា

Share This Post:

SPONSOR

អត្តបទទាក់ទង

កិច្ចប្រជុំពិសេសរដ្ឋមន្ត្រីការបរទេសអាស៊ាននៅថ្ងៃស្អែក នឹងផ្តោតទៅលើស្ថានភាពបច្ចុប្បន្នរវាងកម្ពុជា និងថៃ

នាយឧត្តមសេនីយ៍ វង្ស ពិសេន អញ្ជើញចុះសួរសុខទុក្ខយុទ្ធជនរងរបួស សម្រាកព្យាបាលនៅមន្ទីរពេទ្យព្រះកេតុមាលា