ថៃចែកមួកសុវត្ថិភាពចំនួន ៥០០ ជូនដល់អ្នកបើកបរទោចក្រយានយន្ត មុនពេលសង្ក្រាន្តឆ្នាំថ្មីមកដល់

មូលនិធិអភិវឌ្ឍន៍ រួមជាមួយប៉ូលីសប្រចាំក្រុង និងអភិបាលក្រុង Patong នឹងប្រគល់មួកសុវត្ថិភាពចំនួន ៥០០ ដល់អ្នកបើកបរទោចក្រយានយន្តនៅក្រុង Patong នៅមុនថ្ងៃបុណ្យសង្ក្រាន្តក្រោមយុទ្ធនាការ «ឯណាទៅមួកសុវត្ថិភាពរបស់អ្នក?»។ មេប៉ូលិសក្រុង Patong លោក Anothai Jindamanee មានប្រសាសន៍ថា៖ «កន្លងមកនេះអ្នកបើកបរម៉ូតូជាច្រើននាក់បានរងរបួស និងស្លាប់ក្នុងគ្រោះថ្នាក់ចរាចរណ៍ ហើយយើងចង់ឱ្យអ្នកបើកបរម៉ូតូ និងអ្នកដំណើរពាក់មួកសុវត្ថិភាពគ្រប់គ្នា ១០០% »

លោក Anothai Jindamanee បានបន្តថា៖ «យើងនឹងប្រគល់មួកសុវត្ថិភាពចំនួន ៥០០សម្រាប់ ទៅឱ្យអ្នកបើកបរទោចក្រយានយន្តនៅថ្ងៃទី ១១ ខែមេសា ចាប់ពីម៉ោង ៤ និង ៣០នាទី រសៀល នៅលើផ្លូវ Bangla ក្រុង Patong ខេត្តភូកេត»។ យ៉ាងណាមិញសារព័ត៌មាន Thaiger ក៏បានកត់សម្គាល់ផងដែរថា យុទ្ធនាការប្រគល់មួកសុវត្ថិភាពទាំងនេះ អាចចូលរួមក្នុងការលើកទឹកចិត្តដល់ប្រជាជនថៃឱ្យពាក់មួកការពារសុវត្ថិភាពបានគួរសម ដោយសារខេត្តនេះមានបញ្ហាជាមួយការមិនពាក់មួកសុវត្ថិភាពច្រើន ដែលជាហេតុធ្វើឱ្យអ្នកបើកបររបួសធ្ងន់ និងស្លាប់រាល់ពេលមានគ្រោះថ្នាក់៕

អត្ថបទ៖ លីដា
ប្រភព៖ thethaiger