ខេត្តកំពង់ចាម៖ យោងតាមការចុះផ្សាយរបស់ រដ្ឋបាលជលផល បានឱ្យដឹងថា នៅថ្ងៃទី៣០ ខែសីហា ឆ្នាំ២០២៤ សមត្ថកិច្ចជំនាញនៃខណ្ឌរដ្ឋបាលជលផលនៃខេត្តកំពង់ចាម កំពង់ធំ និងខេត្តកំពង់ឆ្នាំង បានចុះបង្ក្រាបបទល្មើសប្រមូលទិញនិងដឹកជញ្ជូនកូនត្រី សរុបបានចំនួន ៣ករណី រួមមាន៖

១. មន្រ្តីខណ្ឌរដ្ឋបាលកំពង់ចាម បង្រ្កាបបាន១ករណី ដោយឃាត់ចាប់បានរថយន្តចំនួន១គ្រឿង
២. មន្ត្រីខណ្ឌរដ្ឋបាលកំពង់ធំ បង្ក្រាបបាន១ករណី ដោយឃាត់ចាប់បានទូកចំនួន២គ្រឿង
៣. មន្ត្រីខណ្ឌរដ្ឋបាលកំពង់ឆ្នាំង បង្ក្រាបបាន១ករណី ដោយឃាត់ចាប់រ៉ឺម៉កសណ្តោងចំនួន១គ្រឿង។

ក្នុងការបង្ក្រាបនេះ កូនត្រីចម្រុះសរុបប្រមាណ១តោន ចំណែកជនសង្ស័យបានរត់គេចខ្លួន។ វត្ថុតាងខាងលើត្រូវបានបញ្ជូនទៅរក្សាទុកនៅខណ្ឌរដ្ឋបាលជលផលនៃខេត្តនីមួយៗ ដើម្បីកសាងសំណុំរឿងតាមនិតិវិធីច្បាប់ស្តីពីជលផល។ការធ្វើនេសាទចាប់កូនត្រីជាសកម្មភាពបំផ្លិចបំផ្លាញយ៉ាងធ្ងន់ធ្ងរដល់ធនធានជលផល។

សូមបងប្អូនប្រជានេសាទនិងប្រជាពលរដ្ឋ កុំធ្វើនេសាទចាប់កូនត្រី ប្រមូលទិញ ឬដឹកជញ្ជូនកូនត្រីបានមកពីការនេសាទ ដែលទាំងនេះជាសកម្មភាពល្មើសច្បាប់ស្តីពីជលផល។ សូមចូលរួមការពារ ថែរក្សា និងអភិរក្សធនធានជលផល និងប្រភេទវារីសត្វកម្ររបស់យើងឱ្យបានគង់វង្សសម្រាប់កូនចៅជំនាន់ក្រោយ៕

ប្រភព៖ រដ្ឋបាលជលផល Fisheries Administration