រាជរដ្ឋាភិបាល ចេញអនុក្រឹត្យសម្រេចបន្ថែមរបបសន្ដិសុខសង្គមប្រចាំខែចំនួន ២ម៉ឺនរៀល ក្នុងម្នាក់ ជូនដល់អតីតមន្ដ្រីរាជការស៊ីវិល និងអតីតយុទ្ធជន

(រាជធានីភ្នំពេញ)៖ យោងតាមការចុះផ្សាយក្នុងផេកផ្លូវការរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី ២៨ ខែមេសា ឆ្នាំ ២០២៥ នេះ បានឱ្យដឹងថារាជរដ្ឋាភិបាល ចេញអនុក្រឹត្យសម្រេចបន្ថែមរបបសន្ដិសុខសង្គមប្រចាំខែចំនួន ២ម៉ឺនរៀល ក្នុងម្នាក់ ជូនដល់អតីតមន្ដ្រីរាជការស៊ីវិល និងអតីតយុទ្ធជន។

តាមរយៈសេចក្ដីអនុក្រឹត្យមួយនេះ ត្រូវបានបន្ថែមរបបសន្តិសុខសង្គមប្រចាំខែ ចំនួន ២០ ០០០ (ពីរម៉ឺន) រៀល ក្នុង១ (មួយ) នាក់ ជូន ដល់ អតីតមន្ត្រីរាជការស៊ីវិល និងអតីតយុទ្ធជន ដែលបានចូលនិវត្តន៍មុនឆ្នាំ២០២៤។

ក្នុងរបបសន្តិសុខសង្គមប្រចាំខែរបស់អតីតមន្ត្រីរាជការស៊ីវិល និងអតីតយុទ្ធជន ដែលមានកម្រិតទាបជាង ៨៤៥ ០០០ (ប្រាំបីសែនបួនម៉ឺនប្រាំពាន់) រៀល ត្រូវដំឡើងឱ្យដល់ ៨៤៥ ០០០ (ប្រាំបីសែនបួនម៉ឺនប្រាំពាន់) រៀល៕

ប្រភព៖ Samdech Thipadei Hun Manet