ក្មេងជំទង់មកពីទីក្រុង Adelaide របស់ប្រទេសអូស្ត្រាលីម្នាក់ ដែលបាន Hack ចូលក្នុងប្រព័ន្ធកុំព្យូទ័ររបស់ក្រុមហ៊ុន Apple ចំនួន ២ដង ត្រូវបានគេបញ្ជូនទៅតុលាការហើយ។ ក្មេងប្រុសអាយុ ១៧ឆ្នាំ ដែលសុំមិនបញ្ចេញឈ្មោះម្នាក់នេះ បានលួច Hack ចូលប្រព័ន្ធបច្ចេកវិទ្យារបស់ក្រុមហ៊ុនយក្ស Apple ជាលើកដំបូងកាលពីគាត់មានអាយុត្រឹមតែ ១៣ឆ្នាំ ប៉ុណ្ណោះ ហើយលើក ទី២ នៅពេលដែលគាត់មានអាយុ ១៥ឆ្នាំ។ រូបគេត្រូវបានកំណត់មុខសញ្ញាដោយអាជ្ញាធរ បន្ទាប់ពីមានការរាយការណ៍ពីក្រុមហ៊ុន Apple តាមរយៈការិយាល័យ​ស៊ើប​អង្កេត​សហព័ន្ធ FBI របសអាមរិក និងបានបន្តទាក់ទងមកប៉ូលីសសហព័ន្ធអូស្ត្រាលី។

ទោះជាយ៉ាងណាព្រះរាជអាជ្ញាបានប្រាប់តុលាការយុវជនកាលពីថ្ងៃចន្ទថា ក្រុមហ៊ុន Apple មិនបានរងការខូចខាត ឬខាតបង់ដោយសារតែការលួចបន្លំនោះទេ។ តុលាការក៏បានឱ្យដឹងដែរថា ក្មេងប្រុសនេះមានបំណងប្រាថ្នា ដើម្បីទទួលបានការងារជាមួយក្រុមហ៊ុន Apple ទើបធ្វើបែបនេះ។ គាត់ក៏បានសារភាពថា មានពិរុទ្ធភាពចំពោះការកែប្រែទិន្នន័យដោយមិនមានការអនុញ្ញាត ហើយត្រូវបានដាក់ឱ្យជាប់កិច្ចសន្យារយៈពេល ៩ខែ ដើម្បីពង្រឹងអាកប្បកិរិយាល្អឡើងវិញ។ យ៉ាងណាមិញគ្មានការកាត់ឱ្យជាប់ទោសក្នុងកម្រិតណាមួយត្រូវបានកត់ត្រានោះទេ៕

អត្ថបទ៖ លីដា
ប្រភព៖ 9news