អាជ្ញាធរជាតិអប្សរាកំពុងជួសជុលពង្រឹងតួប៉មលេខ១៣នៃប្រាសាទឥដ្ឋ លើភ្នំបាខែង
យោងតាមការផ្សព្វផ្សាយរបស់ ក្រសួងព័ត៍មាន នាពីថ្ងៃទី ២ ខែកក្កដា ឆ្នាំ ២០២៥ នេះបានឱ្យដឹងថា នៅខេត្តសៀមរាប អាជ្ញាធរជាតិអប្សរាបាននិងកំពុងជួសជុលពង្រឹងតួប៉មលេខ១៣នៃប្រាសាទឥដ្ឋ លើភ្នំបាខែងអស់រយៈពេល២ខែមកហើយ។
អាជ្ញាធរជាតិអប្សរាបានឱ្យដឹងនៅថ្ងៃទី២ ខែកក្កដា ឆ្នាំ២០២៥នេះថា ក្រុមការងារនាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរា បាននឹងកំពុងជួសជុសពង្រឹងតួប៉មប្រាសាទឥដ្ឋ លេខ១៣ឬG13 នៅលើភ្នំបាខែង ដើម្បីឱ្យរចនាសម្ព័ន្ធនៃប្រាសាទឥដ្ឋ មានកម្ពស់ជាង១០ម៉ែត្រមួយនេះ បានរឹងមាំឡើងវិញ។
លោកស្រី ឈុន រតនា មន្ត្រីនាយកដ្ឋានអភិរក្សប្រាសាទ និងបុរាណវិទ្យានៃអាជ្ញាធរជាតិអប្សរាបានអធិប្បាយអំពីការងារមួយនេះថា ដោយពិនិត្យឃើញស្ថានភាពគ្រោះថ្នាក់នៃតួប៉មG13 មានតាំងពីខឿន ជញ្ជាំងខាងក្នុងនិងខាងក្រៅ រហូត ដល់ផ្នែកដំបូល បើទោះបីធ្លាប់មានការទល់ទ្រដោយអង្គការWMFពីមុនមកក៏ដោយ នៅតែប្រឈមនិងហានិភ័យខ្ពស់ នៃការបាក់រលុះនៅថ្ងៃណាមួយ។ចាប់តាំងពីដើមខែឧសភា ឆ្នាំ២០២៥មក ក្រុមការងារ បានចាប់ផ្តើមអនុវត្តការជួសជុលពង្រឹងតួប៉មទី១៣នៃប្រាសាទឥដ្ឋ។
លោកស្រីបន្ថែមថា ដើម្បីធានាឱ្យបានអំពីភាពរឹងមាំទៅថ្ងៃខាងមុខ ដំណើរការជួសជុលត្រូវចាប់ផ្តើមពង្រឹងតាំងពីផ្នែកខឿនខាងក្រោម ទើបបន្តទៅផ្នែកជញ្ជាំង និងផ្នែកដំបូល ជាជំហានៗ ដោយប្រើប្រាស់បាយអ បិទភ្ជាប់ឥដ្ឋដែលមានប្រហោងឬស្រទាប់ ដើម្បីធានាការជ្រាបទឹក ការពារស្មៅដុះ និងសត្វចូលទៅរស់នៅតាមចន្លោះឬប្រហោងនៃប្រាសាទ។ ប៉ុន្តែ ក្នុងដំណាក់កាលទីមួយ ការជួសជុលបានចាប់ផ្តើមពីខឿន រហូតដល់ផ្តែ ពោលគឺមានកម្ពស់៥ម៉ែត្រ ដោយគម្រោងដំណាក់កាលទីមួយ គ្រោងនិងបញ្ចប់ចុងខែវិច្ឆិកា ឆ្នាំ២០២៥។ ចំណែកដំណាក់កាលទី២ គ្រោងអនុវត្តនៅឆ្នាំបន្ទាប់។
អ្នកជំនាញបានឱ្យដឹងថា ប្រាសាទឥដ្ឋ នៅជុំវិញភ្នំបាខែង មានសរុបចំនួន៤៤តួប៉ម។ នៅឆ្នាំ២០២៤ អាជ្ញាធរជាតិអប្សរា បានជួសជុលរួចរាល់មានតួប៉ម G14 G15 និងបច្ចុប្បន្នកំពុងជួសជុលពង្រឹងនៅតួប៉មG13។ ដោយឡែកនៅឆ្នាំ២០១២ អាជ្ញាធរជាតិអប្សរា សហការជាមួយអង្គការ WMF ជួសជុលប្រាង្គ G5 និង G10 ផងដែរ។
អាជ្ញាធរជាតិអប្សរាបានឱ្យដឹងថា ដោយសារកត្តា អាយុកាល សម្ភារនៃសំណង់ និងអាកាសធាតុផង ធ្វើឱ្យរចនាសម្ព័ន្ធនៃប្រាសាទឥដ្ឋទាំងនោះ បានរងការខូចខាតយ៉ាងច្រើន ទើបអាជ្ញាធរលើកគម្រោងជួសជុល អភិរក្សជាដំណាក់កាលៗ៕
ប្រភព៖ ក្រសួងព័ត៍មាន