ក្រសួងសាធារណការ៖ នាវាឆ្នេរសមុទ្រ និងនាវាផ្លូវទឹកនៅកម្ពុជា តម្រូវឱ្យមានការត្រួតពិនិត្យលក្ខណៈបច្ចេកទេស

(រាជធានីភ្នំពេញ)៖ តាមការចុះផ្សាយរបស់ ក្រសួងសាធារណការ និងដឹកជញ្ជូន នៅថ្ងៃទី ៤ ខែកញ្ញា ឆ្នាំ ២០២៥ នេះ បានឱ្យដឹងថា នាវាឆ្នេរសមុទ្រ និងនាវាផ្លូវទឹកនៅកម្ពុជា តម្រូវឱ្យមានការត្រួតពិនិត្យលក្ខណៈបច្ចេកទេស។

យោងតាមច្បាប់ស្តីពីការដឹកជញ្ជូនតាមផ្លូវទឹក មាត្រា ១៤ ក្រសួងសាធារណការនិងដឹកជញ្ជូនបានបញ្ជាក់ថា នាវាឆ្នេរសមុទ្រ និងនាវាផ្លូវទឹកនៅក្នុងប្រទេសកម្ពុជា ដែលធ្វើនាវាចរណ៍នៅតាមផ្លូវទឹក ត្រូវតែឆ្លងកាត់ការត្រួតពិនិត្យលក្ខណៈបច្ចេកទេសជាចាំបាច់។

ចំពោះការត្រួតពិនិត្យនេះមានគោលបំណងធានាសុវត្ថិភាព និងប្រសិទ្ធភាពនៃការធ្វើនាវាចរណ៍។ តាមរយៈការត្រួតពិនិត្យនេះ នាវានីមួយៗនឹងត្រូវទទួលបានវិញ្ញាបនបត្រត្រួតពិនិត្យលក្ខណៈបច្ចេកទេសនាវា ដើម្បីបញ្ជាក់ថាបានបំពេញតាមលក្ខខណ្ឌតម្រូវរបស់ច្បាប់។

ដោយឡែក បទប្បញ្ញត្តិនេះ ត្រូវបានដាក់ចេញដើម្បីការពារអាយុជីវិតអ្នកដំណើរ ទំនិញ និងបរិស្ថាន ក៏ដូចជាធានាឱ្យវិស័យដឹកជញ្ជូនតាមផ្លូវទឹកនៅកម្ពុជាមានការរីកចម្រើនប្រកបដោយនិរន្តរភាព។ វិញ្ញាបនបត្រនេះជាឯកសារផ្លូវការដែលបញ្ជាក់ពីការអនុវត្តត្រឹមត្រូវតាមលក្ខណៈបច្ចេកទេសនិងស្តង់ដារសុវត្ថិភាពដែលបានកំណត់៕

ប្រភព៖ ក្រសួងសាធារណការ និងដឹកជញ្ជូន