ក្រុមហ៊ុនជាច្រើនមកពីទីក្រុង ហុងកុង ជ្រើសរើសប្រទេសកម្ពុជា ក្នុងការធ្វើកិច្ចសហប្រតិបត្តិការផ្នែកជំនួញរវាងគ្នានិងគ្នា

(ភ្នំពេញ)៖ បន្ទាប់ពីដឹកនាំគណប្រតិភូហុងកុងមកធ្វើទស្សនកិច្ចនៅកម្ពុជា អស់រយៈពេល២ថ្ងៃមក ទីបំផុតហុងកុងបានសម្រេចជ្រើសរើស ប្រទេសកម្ពុជាជាប្រទេសទី១ ដើម្បីធ្វើកិច្ចសហប្រតិបត្តិការលើផ្នែកជំនួញរវាងគ្នានិងគ្នា។ នេះបើតាមការឲ្យដឹងពីលោក Edward Yau លេខាធិការពាណិជ្ជកម្ម និងអភិវឌ្ឍន៍សេដ្ឋកិច្ចនៃរដ្ឋបាលរដ្ឋបាលពិសេស នៃរដ្ឋបាលក្រុងហុងកុង ដែលបានដឹកនាំគណៈប្រតិភូមកធ្វើ
ទស្សនកិច្ចនៅ​កម្ពុជា។

ថ្លែងឲ្យដឹងក្នុងសន្និសីទសារព័ត៌មាននៅថ្ងៃទី២០ ខែមីនា ឆ្នាំ២០១៨នេះ លោក Edward Yau បានថ្លែងឲ្យដឹងថា «ខ្ញុំពិតជាមានភាពសប្បាយរីក​រាយណាស់ដែលបានមកទស្សនកិច្ចនៅកម្ពុជា ក្នុងដំនើរទស្សនកិច្ចនេះក៏មានអ្នកចូលរួមជាច្រើនផងដែរ ដែលរួមមានទាំងប្រធានក្រុមហ៊ុន, តំណាង​មកពីសភាពពាណិជ្ជកម្មមកពីទីក្រុងហុងកុង, អ្នកជំនួញ, អ្នកវិជ្ជាជីវៈឯកទេស, មេធាវី, វិស្វកម្ម និងខាងធនាគារជាច្រើនទៀតផងដែរ»។

លោកបានថ្លែងទៀតថា ការមកទស្សនកិច្ចនៅកម្ពុជានេះ គឺដើម្បីស្វះស្វែងឱកាសធ្វើពាណិជ្ជកម្ម និងវិនិយោគ លើវិស័យផលិតកម្ម ក្នុងនោះផងដែរក៏​មានសហគ្រិនវ័យក្មេងដទៃទៀត បានមកកម្ពុជាដើម្បីពិនិត្យមើល កាលានុវត្តភាពទាំងឡាយសម្រាប់ធ្វើសហប្រតិបត្តិការ រវាងក្រុងហុងកុង និងកម្ពុជា។

លោកបានបញ្ជាក់ទៀតថា «ក្នុងដំណើរទស្សនកិច្ចនេះ ហុងកុងបានសម្រេចចិត្តជ្រើសយកប្រទេសកម្ពុជា ក្នុងការធ្វើសហប្រតិបត្តិការរវាងគ្នា និងគ្នា ក៏ដូចជាដើម្បីពង្រីកនូវជំនួញ រវាងទីក្រុងហុងកុង និងប្រទេសកម្ពុជា»។ លោកបញ្ជាក់ទៀតថា ក្នុងដំណើរទស្សនៈកិច្ចនេះ ក៏បានជួបនឹងរដ្ឋមន្រ្ដី​ក្រសួងពាណិជ្ជកម្ម និងទេសរដ្ឋមន្រ្ដី រដ្ឋមន្រ្ដីក្រសួងសាធារណៈការ និងដឹកជញ្ជូន ដោយរដ្ឋមន្រ្ដីទាំង២រូបនេះ បានជម្រាបដល់ខាង​គណៈប្រតិភូ​ហុងកុង ពីកាលានុវត្តភាពផ្នែកវិនិយោគដ៏ធំនៅកម្ពុជា ដែលកម្ពុជាអាចកាលានុវត្តភាពខាងផ្នែកអភិវឌ្ឍន៍ហេដ្ឋារចនាសម្ព័ន្ធ ដូចជាផ្លូវរថភ្លើង កំពង់ផែ ដែលអាចតភ្ជាប់ពីកម្ពុជាទៅកាន់តំបន់ផ្សេងៗ។

សូមបញ្ជាក់ថា គណៈប្រតិភូធុរកិច្ចហុងកុងជាន់ខ្ពស់ បានមកធ្វើទស្សនកិច្ចនៅកម្ពុជារយៈពេល២ថ្ងៃចាប់ពីថ្ងៃទី១៩ដល់ថ្ងៃទី២០ ខែមីនា ឆ្នាំ​២០១៨ ក្នុងឱកាសបេសកកម្មជំនួញមួយ ដែលរៀបចំដោយក្រុមប្រឹក្សា អភិវឌ្ឍន៍ពាណិជ្ជកម្មហុងកុង (HKTDC) ដើម្បីស្វែងរកការវិនិយោគវិស័យ​ផលិតកម្មរវាងកម្ពុជា និងហុងកុង។


សូមជម្រាបថា ក្រុមប្រឹក្សាអភិវឌ្ឍន៍ពាណិជ្ជកម្មហុងកុង (HKTDC) គឺជាស្ថាប័នមួយដែលត្រូវបាន បង្កើតឡើងនៅឆ្នាំ១៩៩៦ ជាដៃគូទីផ្សារអន្តរជាតិសម្រាប់ក្រុមហ៊ុនផលិត និងអ្នកផ្តល់សេវាកម្មដែលមានមូលដ្ឋាននៅហុងកុង និងជាដៃគូទីផ្សារអន្ដរជាតិរបស់ហុងកុង សម្រាប់ក្រុមហ៊ុន​, អ្នកជំនួញ​ និងអ្នកផ្ដល់សេវាកម្ម ដែលមានមូលដ្ឋាននៅហុងកុង ព្រមទាំងមានការិយាល័យជាង៤០នៅទូទាំងពិភពលោក៕