ការរញ្ជួយដីកម្រិត ៦.០រិចទ័រ បានវាយប្រហារកោះតៃវ៉ាន់ ធ្វើឱ្យអគាររាប់ពាន់ខ្នងត្រូវដាច់ចរន្តអគ្គិសនី

ការរញ្ជួយដីកម្រិត ៦.០រិចទ័រ បានវាយប្រហារឆ្នេរភាគឦសានរបស់កោះតៃវ៉ាន់នៅថ្ងៃព្រហស្បតិ៍នេះ ដោយធ្វើឱ្យរញ្ជួយអគារ និងអគារប្រមាណ ២,០០០ ត្រូវបាត់បង់អគ្គិសនី។ រ៉យទ័របាននិយាយថា ការរញ្ជួយដីបានធ្វើឱ្យប៉ះពាល់អគារជាច្រើននៅក្នុងរដ្ឋធានីតៃប៉ិ។ ហើយការរញ្ជួយដីនេះបានវាយប្រហារនៅជិតតំបន់ភាគឦសាន នៃតំបន់ Yilan និងមានជម្រៅ ២២គីឡូម៉ែត្រ។ យ៉ាងណាមិញមិនមានរបាយការណ៍ជាបន្ទាន់ អំពីការខូចខាតនោះទេ ប៉ុន្តែ CNA និយាយថា មានមនុស្សម្នាក់បានស្លាប់ក្នុងហេតុការណ៍នេះ។

ការរញ្ជួយដីបានបង្កឱ្យមានការដាច់ចរន្តអគ្គិសនី និងបង្ខំឱ្យផ្អាកសេវាកម្មផ្លូវដែកក្នុងតំបន់នៅភាគខាងជើងកោះតៃវ៉ាន់។ ក៏មានរបាយការណ៍នៃការលេចធ្លាយឧស្ម័ន និងទឹកផងដែរ។ គួររលឹកដែរថា កាលពី ឆ្នាំ២០១៦ មានមនុស្សជាង ១០០នាក់ ត្រូវបានស្លាប់ នៅក្នុងគ្រោះរញ្ជួយដីមួយនៅឯភាគខាងត្បូងកោះ ហើយការរញ្ជួយដីកម្រិត ៧.៦រិចទ័រ ដែលបានសម្លាប់មនុស្សជាង ២,០០០នាក់ ក្នុងឆ្នាំ១៩៩៩ ក៏នៅតែដក់ជាប់ក្នុងការចងចាំរបស់ប្រជាជននៅលើកោះនេះ៕

អត្ថបទ៖ លីដា