កម្មករចិនចំនួន ១៧នាក់ បានបាត់ខ្លួន បន្ទាប់ពីមានការរអិលបាក់ដី នៅពេលដែលពួកគេកំពុងជួសជុលផ្លូវរថភ្លើងមួយកន្លែង

ចិន៖ យោងតាមប្រភព CGTN បានឱ្យដឹងថា កម្មករចិនសរុបចំនួន ១៧នាក់ នៅតែបន្តបាត់ខ្លួន បន្ទាប់ពីមានការបាក់ដីមួយបានកើតឡើងកាលពីថ្ងៃពុធ នៅស្រុក Ganluo ក្នុងខេត្តស៊ីឈួនប្រទេសចិន។ មុនពេលកើតហេុតកម្មករជាង ២០នាក់ ត្រូវបានគេឱ្យដឹងថា បាននាំគ្នាទៅជួសជុសផ្លូវដែក ឆេងឌូ-គុនមីង ហើយក្រោយមកដីភ្នំក៏បានបាក់ស្រុតចុះធ្លាក់មកលើកម្មករ នៅប្រហែលជាម៉ោង ១២ និង ៤៤នាទី ថ្ងៃត្រង់ ហើយប្រតិបត្ដិការសង្គ្រោះនៅតែបន្ដដំណើរការ ដើម្បីស្វែងរកពួកគេ។

យោងតាមនាយកដ្ឋានគ្រប់គ្រងគ្រាអាសន្នខេត្តស៊ីឈួនឱ្យដឹងថា ក្រុមអ្នកជួយសង្គ្រោះចំនួន ៧០នាក់ កំពុងធ្វើការនៅនឹងកន្លែង ដោយមានសត្វឆ្កែជួយសង្គ្រោះ និងឧបករណ៍ផ្សេងៗគ្នា រាប់បញ្ចូលទាំងឧបករណ៍ជីករក ឧបករណ៍រុករកអ្នកនៅមានជីវិត និងឧបករណ៍បញ្ជូនរូបភាព។ នាយកដ្ឋានបាននិយាយថា មនុស្សសរុបចំនួន ២៧នាក់ ត្រូវបានរៀបចំដើម្បីធ្វើការត្រួតពិនិត្យនៅក្នុងតំបន់ជុំវិញកន្លែងកើតហេតុ ដែលមានគ្រោះថ្នាក់ណាមួយ៕

អត្ថបទ៖ លីដា