ហួសចិត្ត! ស្រ្តីម្នាក់ស្រវឹងស្រា ខឹងចិត្តដើររកប្តីចុងមិនឃើញ ក៏វាយធ្វើបាបកូនស្រីច្បងរបួសជាំស្មា ចំណែកកូនតូចវិញចាប់ជើងយួរឡើងលើ

ភ្នំពេញ៖ មានការភ្ញាក់ផ្អើលដល់សមត្ថកិច្ចខណ្ឌពោធិ៍សែនជ័យ ចុះជួយអន្តរាគមន៍ ខណៈដែលស្ត្រីម្នាក់ សង្ស័យស្រវឹងស្រា បានវាយធ្វើបាបកូនស្រីតូចៗ២នាក់ បណ្តាលឲ្យរងរបួសធ្ងន់២នាក់ ព្រោះតែស្ត្រីរូបនោះ នាំកូនដើររកប្តីចុងមិនឃើញ។ ហេតុការណ៍នេះ បានកើតឡើងកាលពីវេលាម៉ោង៨និង៣០នាទីយប់ ថ្ងៃសុក្រ ទី១៦ ខែសីហា ឆ្នាំ២០១៩ នៅត្រង់ចំណុចមុខផ្សារសិនជូរីផ្លាហ្សា លើសួនកុមាពោធិ៍ចិនតុង ស្ថិតនៅក្នុងភូមិតាងួនទី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចមូលដ្ឋាន បានឲ្យដឹងថា ស្ត្រីជាម្តាយដែលវាយកូនៗឲ្យរបួសនោះមានឈ្មោះ ស្រឿន ចន្ធី អាយុ៣២ឆ្នាំ ជនជាតិខ្មែរ មុខរបរធ្វើការរោងចក្រ ស្នាក់នៅភូមិចំបក់២ សង្កាត់កាកាបទី១ ខណ្ឌពោធិ៍សែនជ័យ មានស្រុកកំណើត នៅភូមិកោះខែល ស្រុកស្អាង ខេត្តកណ្តាល។ ចំណែក កូនរងគ្រោះទាំង២នាក់ ទី១-ឈ្មោះ វ៉ាន់ ស្រីស្រស់ ភេទស្រី អាយុ៩ឆ្នាំ រងរបួសជាំស្មា និងពកក្បាល និងកូនទី២-ឈ្មោះ ស៊ិន កញ្ជនា ភេទស្រី អាយុ១១ខែ មានសភាពស្លេកស្លាំង និងក្តៅខ្លួន ត្រូវបានសមត្ថកិច្ចដឹកទៅសង្រ្គោះនៅមន្ទីរពេទ្យកុមារជាតិ។

សមត្ថកិច្ចបានប្រាប់ថាបន្ទាប់ពីទទួលដំណឹងពីប្រជាពលរដ្ឋបានមកប្រាប់ថា មានករណីស្រ្តីខាងលើកំពុងប្រើហិង្សាលើកូនស្រីច្បង និងកូនតូចចាប់ជើងយួរឡើងលើ ពេលទទួលបានដំណឹងនេះភ្លាម កម្លាំងសមត្ថកិច្ចក៏ចុះអន្តរាគមន៍ និងនាំខ្លួនស្រ្តីខាងលើ យកមកប៉ុស្តិ៍នគរបាលរដ្ឋបាលកាកាបទី១ ដើម្បីសួរនាំ។ ប្រភពដដែលបានបន្តទៀតថា រូបគាត់បានសួរកូនបងពីមូលហេតុដែលម្តាយវាយ ពេលនោះ កូនបងបាននិយាយប្រាប់ថា ម្តាយរបស់គាត់ស្រវឹងស្រា បានដើររកប្តីចុងមិនឃើញ ក៏បញ្ចេញកំហឹងវាយកូនបែបនេះឡើង។ ប្រភពដដែលបានបញ្ចាក់ប្រាប់ថា ស្រ្តីខាងលើ មានប្តី២ មានកូន៣នាក់ ប្តីទី១បានលែងលះគ្នាដាច់ស្រាច់ ហើយបានយកកូនមួយទៅចិញ្ចឹម ក្រោយមកក៏មានប្តីហេងស៊យមួយទៀត ជូនឃើញជូនបាត់ ទើបធ្វើឲ្យស្ត្រីខាងលើ ផឹកស្រាស្រវឹងកើតរោគចិត្តវ៉ៃកូនបែបនេះឡើង។ ខណៈពេលមកដល់ប៉ុស្តិ៍ស្រ្តីខាងលើ បានអុកឡុកពេញប៉ុស្តិ៍វាយកៅអី កង្ហាបាក់បែកធ្វើឲ្យសមត្ថកិច្ចសម្រេចចចិត្តដាក់ខ្នោះតែម្ដង។ ក្រោយមក សមត្ថកិច្ចបានអប់រំណែនាំឲ្យស្រ្តីខាងលើ ឲ្យឈប់វ៉ៃកូនទៀត ហើយក៏ឲ្យស្ត្រីខាងលើត្រឡប់ទៅផ្ទះវិញ៕

ប្រភព៖ សេនាធិការ នគរបាលស្រុកស្អាង